صحت و سائنس

چلنے پھرنے میں مشکلات کا سامنا؟ تو یہ الزائمر امراض کی ابتدائی نشانی ہو سکتی ہے

16 اکتوبر ، 2023

ایک نئی تحقیق میں اس بارے میں بتایا گیا / فائل فوٹو

کیا آپ کو چہل قدمی کرتے ہوئے سمت کا تعین کرنے یا مڑنے میں مشکلات کا سامنا ہوتا ہے؟ اگر ہاں تو یہ ایک سنگین مرض کی ابتدائی نشانی ہو سکتی ہے۔

یہ بات برطانیہ میں ہونے والی ایک طبی تحقیق میں سامنے آئی۔

لندن کالج یونیورسٹی کی اس تحقیق میں بتایا گیا کہ چہل قدمی کے دوران مشکلات کا سامنا ہونا الزائمر امراض کا ابتدائی اشارہ ہو سکتا ہے۔

دماغی تنزلی کا باعث بننے والی اس مرض کا ابھی کوئی مؤثر علاج موجود نہیں اور یہ آہستہ آہستہ مریض کو موت کے منہ میں دھکیل دیتا ہے۔

تحقیق میں بتایا گیا کہ الزائمر کے آغاز پر مریضوں کو چہل قدمی کے دوران مختلف مسائل کا سامنا ہوتا ہے۔

اس تحقیق میں 110 افراد کو شامل کیا گیا تھا اور انہیں 3 گروپس میں تقسیم کیا گیا۔

ایک گروپ 31 صحت مند جوان افراد کا تھا، دوسرا گروپ 36 صحت مند معمر افراد پر مشتمل تھا جبکہ تیسرے میں 43 ایسے افراد شامل تھے جن کو معمولی دماغی تنزلی کا سامنا تھا۔

اس کے بعد ان افراد کو ورچوئل رئیلٹی گلاس پہن کر مختلف کام کرنے کا کہا گیا۔

ان افراد کو ایک راستے پر چہل قدمی کرائی گئی جس میں مختلف رکاوٹیں رکھی گئی تھیں تاکہ انہیں بار بار مڑنا پڑے۔

نتائج سے معلوم ہوا کہ معمولی دماغی تنزلی کا سامنا کرنے والے افراد کو چلنے پھرنے کے دوران مشکلات کا سامنا ہوا۔

تحقیق کے مطابق ان افراد کے لیے سمت کا تعین کرنا مشکل ہوا جبکہ مڑتے ہوئے بھی مسائل کا سامنا ہوا۔

اس کے برعکس دیگر گروپس کو اس طرح کے مسائل کا سامنا نہیں ہوا۔

محققین نے بتایا کہ چہل قدمی کے دوران مڑنے اور سمت کے تعین کے مسائل سے دماغی تنزلی کا عندیہ ملتا ہے۔

انہوں نے کہا کہ نتائج سے ڈاکٹروں کو الزائمر امراض کو جلد تشخیص کرنے میں مدد مل سکے گی۔

ان کا کہنا تھا کہ الزائمر امراض کی تشخیص کافی مشکل ہوتی ہے اور اکثر بہت تاخیر سے ہوتی ہے، ہماری تحقیق سے اس بیماری کی جلد تشخیص کا ایک نیا راستہ کھل گیا ہے۔