قرض کے بجائے سرمایہ کاری اور شراکت داری ترجیح ہے: وزیراعظم کی ورلڈ بینک وفد سے گفتگو

وزیر اعظم شہباز شریف نے کہا ہے کہ ورلڈ بینک کے تحت پاکستان میں 40ارب ڈالرکی سرمایہ کاری خوش آئند ہے اور 20 ارب ڈالر سے صحت، تعلیم، ترقیِ نوجوانان، سماجی شعبوں کے منصوبوں سے ترقی کا نیا باب کھلے گا۔

وزیرِاعظم شہبازشریف سے عالمی بینک کے ایگزیکٹیو ڈائریکٹرز کے وفد نے ملاقات کی۔ ورلڈ بینک کے 9 ایگزیکٹو ڈائریکٹرز پاکستان کے دورے پر آئے ہیں۔

وزیرِاعظم نے وفد کی پاکستان آمد پر خیرمقدم کیا اور کہا کہ عالمی بینک اور پاکستان کی شراکت داری گزشتہ سات دہائیوں ہر محیط ہے، عالمی بینک کےتعاون سے پاکستان میں متعدد بڑے منصوبے تعمیر ہوئے، ان منصوبوں نے پاکستان کی ترقی میں اہم کردار ادا کیا۔

انہوں نے کہا کہ پاکستان نے عالمی بینک کے ساتھ شراکت داری سے استفادہ حاصل کیا، عالمی بینک نے 2022 کے سیلاب کے دوران پاکستان میں متاثرہ لوگوں کی بھرپور مدد کی، کنٹری پارٹنرشپ فریم ورک کے تحت پاکستان میں 40ارب ڈالرکی سرمایہ کاری ہوگی جوخوش آئندہے۔

ان کا کہنا تھاکہ 20 ارب ڈالرسے صحت، تعلیم، ترقیِ نوجوانان، سماجی شعبوں کے منصوبوں سے ترقی کانیا باب کھلےگا، آئی ایف سی کے تحت پاکستان کے نجی شعبے میں 20 ارب ڈالرکی سرمایہ کاری سےملکی معیشت کاپہیہ تیزی سے گھومے گا۔

وزیرِاعظم نے مزید کہا کہ عالمی بینک کے حکومت کی پالیسیوں پر اعتماد کے شکر گزار ہیں، پاکستان کا ادارہ جاتی و معاشی اصلاحات کا پروگرام تیزی سے جاری ہے، ملک کی معیشت صحیح سمت اور ترقی کی جانب گامزن ہے، ملکی معیشت کی پائیدار ترقی کیلئے ابھی مزید سفر طے کرنا ہے، معیشت کی بہتری کا سہرا ٹیم کی کوششوں کو جاتا ہے۔

ان کا کہنا تھاکہ ملکی برآمدات، ترسیلات زر میں اضافہ ہو رہا ہے، شرح سود کم ہونے سے پیداواری شعبے میں سرمایہ کاری بڑھ رہی ہے، کرپشن کو کنٹرول کرنے کیلئے نظام میں شفافیت لا رہے ہیں اور ایف بی آر کی اصلاحات میں ڈیجیٹائزیشن پر کام ترجیحی بنیادوں پر جاری ہے۔

شہباز شریف نے کہا کہ اصلاحات سے بجلی کی بلاتعطل فراہمی اور خسارے میں کمی لارہے ہیں، ایس آئی ایف سی کی بدولت سرمایہ کاری کیلئے پر کشش ماحول فراہم کیا گیا ہے، قرضوں کی بجائے سرمایہ کاری اور شراکت داری ترجیح ہے۔

وفد کے شرکا نے پاکستان کے جاری اصلاحاتی پروگرام پر عملدرآمد کی تعریف کی اور کہاکہ وزیرِاعظم کی قیادت میں پاکستان کی معاشی اصلاحات کا سفر تیزی سے جاری ہے۔ 

عالمی بینک کے وفد نے توانائی، صنعت و برآمدات،نجکاری، محصولات ودیگر شعبوں میں اصلاحاتی اقدامات کی تعریف کی۔