ٹک ٹاک میں ایسے فیچر کا اضافہ جو نوجوانوں کو زیادہ پسند نہیں آئے گا

ٹک ٹاک میں ایک ایسا نیا فیچر متعارف کرایا جا رہا ہے جو اس کے کم عمر صارفین کو زیادہ پسند نہیں آئے گا مگر اس کا مقصد نوجوانوں کو تحفظ فراہم کرنا ہے۔

ٹک ٹاک کی جانب سے فیملی پیئرنگ ٹول کافی عرصے سے دستیاب ہے جس کی مدد سے والدین نوجوانوں کے اسکرین ٹائم کو محدود اور مخصوص مواد کو بلاک کرسکتے ہیں۔

اب ٹک ٹاک کی جانب سے اس ٹول کے لیے مزید فیچرز متعارف کرائے جا رہے ہیں تاکہ والدین یہ دیکھ سکیں کہ ان کے بچے کن افراد سے تعلق بڑھارہے ہیں اور فیصلہ کرسکیں کہ کس وقت ایپ تک رسائی ناممکن ہو جائے۔

پہلا فیچر ٹائم اوے ہے جس کی مدد سے والدین ٹک ٹاک پر اپنے بچوں کی ڈیوائسز پر ٹک ٹاک کی دستیابی کو مخصوص وقت لے لیے ناممکن بنا سکیں گے۔

مثال کے طور پر وہ رات کے کھانے کے وقت یا چھٹی کے دن کسی جگہ گھومنے کے دوران ٹک ٹاک تک رسائی ختم کرسکیں گے۔

اسی طرح وہ ہر ہفتے کے لیے ایک شیڈول بھی طے کرسکیں گے جب ٹک ٹاک تک رسائی ختم ہو جائے گی البتہ نوجوان اپنے والدین کی اجازت سے اضافی وقت تک اسے استعمال کرسکیں گے۔

والدین یہ بھی دیکھ سکیں گے کہ ان کے بچے کس کو ٹک ٹاک پر فالو کر رہے ہیں یا ان کو کون فالو کر رہا ہے۔

ٹک ٹاک کے مطابق اس فیچر سے والدین بچوں کی چیٹ کے حوالے سے زیادہ تیار ہوسکیں گے اور اپنے بچوں کو ڈیجیٹل تدریسی صلاحیتوں سے بھی لیس کر سکیں گے۔

تیسرا فیچر اسکرین ٹائم محدود کرنے کے حوالے سے ہے مگر بہت غیر معمولی ہے۔

اس فیچر کے تحت 16 سال سے کم عمر صارفین کے لیے رات 10 بجے کے بعد ٹک ٹاک ویڈیوز غائب ہو جائیں گی۔

رات 10 بجے کے بعد اسکرین پر ویڈیوز غائب ہو جائیں گی اور سکون پہنچانے والی موسیقی شروع ہو جائے گی، البتہ نوجوان اسے ختم کرکے ایپ کا استعمال جاری رکھ سکتے ہیں۔