لندن…متحدہ قومی موومنٹ کے قائد الطاف حسین نے اپر دیر میں پاک افغان سرحد کے بارودی سرنگ دھماکے کی سخت ترین الفاظ میں مذمت کی اور دھماکے میں میجر جنرل ثناء اللہ اور لیفٹیننٹ کرنل توصیف کی شہادت پر گہرے دکھ اور افسوس کااظہا رکیا ہے ۔ ایک بیان میں انہوں نے کہاکہ بارودی سرنگ کے دھماکے کے ذریعے پاک فوج کے افسران کو نشانہ بنانا ملک کی سلامتی پر حملہ ہے اور جو دہشت گرد اس مذموم کارروائی میں ملوث ہیں وہ ملک کوعدم استحکام سے دوچار کرنے کی گھناؤنی سازش پر عمل پیرا ہیں ۔ انہوں نے باوردی سرنگ کے دھماکے میں میجر جنرل ثناء اللہ شہید، لیفٹیننٹ کرنل توصیف شہیداور لانس نائیک عرفان ستار شہیدکے تمام سوگوار ان ، مسلح افواج کے افسران اور سپاہیوں سے دلی تعزیت وہمدردی کااظہار کرتے ہوئے انہیں صبر تلقین کی ۔ انہوں نے دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور سوگواران کو یہ صدمہ برداشست کرنے کا حوصلہ عطاکرے ۔ الطاف حسین نے صدر ممنون حسین، وزیراعظم نواز شریف اور وفاقی وزیر داخلہ چوہدری نثار علی خان سے مطالبہ کیا کہ اپر دیر میں بارودی سرنگ کے دھماکے میں میجر جنرل ثناء اللہ اور لیفٹیننٹ کرنل توصیف کی شہادت کا سختی سے نوٹس لیاجائے اور دہشت گردی کی اس کارروائی میں ملوث عناصر کو فی الفور گرفتا رکرکے قرار واقعی سزا دی جائے ۔دریں اثناء الطاف حسین نے ایم کیوایم شعبہ اطلاعات نیوز سیکشن کے رکن محمد ساجد کے والد عبد الرشید کے انتقال پر گہرے دکھ اور افسوس کااظہا رکیا ہے ۔ ایک تعزیتی بیان میں انہوں نے مرحوم کے سوگوار لواحقین سے دلی تعزیت وہمدردی کااظہار کرتے ہوئے کہاکہ مجھ سمیت ایم کیوایم کے تمام کارکنان آپ کے غم میں برابر کے شریک ہیں ۔ الطاف حسین نے دعا کی کہ اللہ تعالیٰ مرحوم کو جنت الفردوس میں اعلیٰ مقام عطا فرمائے اور ساجد احمد سمیت مرحوم کے تمام سوگواران کو یہ صدمہ برداشت کرنے کا حوصلہ عطاکرے ۔ علاوہ ازیں الطاف حسین نے کراچی یونین آف جرنلسٹس (کے یو جے ) کے انتخابات برائے سال 2013ء میں گرین پینل کی کامیابی پر نومنتخب عہدیداران کو دلی مبارکباد پیش کی ہے ۔ ایک تہنیتی بیان میں انہوں نے کے یو جے کے نومنتخب صدر جی ایم جمالی ، سیکریٹری واجد رضا اصفہانی اور پینل کے دیگر نومنتخب عہدیداران کو دلی مبارکباد پیش کی اور امید ظاہر کی کہ گرین پینل کے نومنتخب عہدیداران صحافیوں کے مسائل اور ان کے حل کیلئے اپنی تمام صلاحیتیں اور تجربے کو استعمال میں لائیں گے اور ملک میں آزاد ی صحافت کے فروغ کیلئے اپنی پیشہ وارانہ ذمہ داریوں کو ہر سطح پر نبھائیں گے ۔