کوئٹہ… کوئٹہ کے علاقے اسپنی روڈ پرفائرنگ میں جاں بحق آٹھ افراد کی تدفین آج ہوگی۔ فائرنگ کا مقدمہ صدر تھانے جبکہ پولیس اہلکار کو فائرنگ کرکے ہلاک کرنے اور ہنگامہ آرائی کے مقدمے بروری تھانے میں درج کرلئے گئے۔ واقعہ کے خلاف آج کوئٹہ میں مختلف جماعتوں کی اپیل پر شٹر ڈاون ہڑتال کی جارہی ہے۔ اس وقت بھی نوجوانوں کی مختلف ٹولیاں علاقوں میں گھوم کر کھلی ہوئی دکانیں بند کرارہی ہیں تاہم کسی بھی جگہ سے کسی ناخوشگوار واقعے کی کوئی اطلاع نہیں۔ واضح رہے کہ گذشتہ روز کوئٹہ کے علاقے اسپنی روڈ پر وین پر ہونے والی فائرنگ میں پانچ افراد اور اس کے بعد ہونے والی ہنگامہ آرائی میں ایک پولیس اہلکار سمیت تین افراد جاں بحق ہوگئے تھے۔ اسپنی روڈ وین فائرنگ واقعہ کا مقدمہ رازق علی نامی شخص کی مدعیت میں نامعلوم افراد کے خلاف درج کیا گیا ، دوسری جانب اسپنی روڈ پر ہنگامہ آرائی کے دوران جاں بحق پولیس اہلکار حکم زمان کے قتل کا مقدمہ ایس ایچ او بروری کی مدعیت میں درج کرلیا ہے۔۔ پولیس نے تینوں نامزد ملزمان افراد غلام یحیٰی، ذوالفقار اور عبداللہ کو گرفتار کرلیا ہے۔ کوئٹہ میں جمعے کی ہڑتال کا اعلان ہزارہ ڈیموکریٹ پارٹی اور پشتونخواہ ملی عوامی پارٹی نے کیا ہے جس کی حمایت عوامی نیشل پارٹی ،تحفظ عزاداری کونسل،بی این پی،جے ڈبلیو پی اور مرکزی انجمن تاجران نے کی ہے۔