کراچی…آئی پی ایل سیزن 5 کی رنگارنگ افتتاحی تقریب آجمنعقد کی جارہی ہے، یہ تقریب جیو سوپر براہ راست نشر کرے گا۔ جیو سوپر تمام میچوں کے ساتھ افتتاحی اور اختتامی تقاریب بھی براہ راست دکھائے گا۔ چنئی میں ہونے والی اس تقریب میں بالی ووڈ کے چمکتے ستاروں کی بڑی تعداد موجود ہوگی۔ ان میں امیتابھ بچن، سلمان خان، کرینہ کپور، پریانکا چوپڑہ اور دیگر شامل ہیں، اس کے علاوہ امریکی پاپ اسٹار کیٹی پیری بھی اپنے فن کا مظاہرہ کریں گی۔ ناظرین اس میگا ایونٹ کی افتتاحی تقریب شام 6 بجے سے دیکھیں گے۔ افتتاحی مقابلہ دفاعی چمپئن چنائی سپر کنگز اور ممبئی انڈینز کے درمیان ایم اے چدمبرم اسٹیڈیم چنائی میں ہوگا۔ اس ٹورنامنٹ میں شائقین کرکٹ اپنے پسندیدہ کھلاڑیوں کی پرفارمنس کے ساتھ معروف کمنٹیٹرز اور تبصرہ نگاروں کی آراء بھی جان سکیں گے۔ ان میں پاکستان کے رمیز راجہ، بھارت کے سنیل گواسکر، ہارشا بھوگلے، سنجے منجریکر اور روی شاستری، نیوزی لینڈ کے ڈینی موریسن، رابن جیک مین اور دیگر شامل ہیں۔افتتاحی تقریب میں ایونٹ میں شریک ٹیموں کے کپتان انٹر نیشنل کرکٹ کونسل (آئی سی سی ) کے وضع کردہ قوانین کی پاسداری کا عہد کریں گے۔واضح رہے کہ آئی پی ایل فائیو کے لئے کھلاڑیوں کی نیلامی 4 فروری کو ہوئی جس میں 9 فرنچائز کے عہدیداروں نے شرکت کی تھی۔