کراچی…متحدہ قومی موومنٹ کی رابطہ کمیٹی نے ایم کیوایم کے لاپتہ کارکنوںکی بازیابی کے سلسلے میں قائم کی گئی مسنگ پرسن کمیٹی کے انچارج بابرانیس ولدانیس الرحمان اورکمیٹی کے رکن وصی احمدکی گرفتاری کی شدید مذمت کی ہے ۔ اپنے بیان میں رابطہ کمیٹی نے کہاکہ بابرانیس کے بھائی اورایم کیوایم کے کارکن گوہرانیس کوایم کیوایم کے خلاف جاری آپریشن کے دوران 20جون 1996ء کوناظم آبادسے پولیس اورقانون نافذ کرنے والے اداروںنے گرفتارکیاتھاجس کے بعد سے دیگرلاپتہ کارکنوںکی طرح آج تک گوہرانیس کاکوئی پتہ نہیں ہے کہ آیاوہ زندہ ہیں یاانہیںشہیدکردیاگیا۔ایم کیوایم کے لاپتہ کارکنوں کی بازیابی اوران کے اہل خانہ سے کوآرڈی نیشن کیلئے یہ کمیٹی کئی سالوں سے کام کررہی ہے ۔ بابرانیس ولدانیس الرحمن ایم کیوایم کی مسنگ پرسن کمیٹی کے انچارج ہیں جبکہ وصی احمداس کمیٹی کے رکن ہیں۔ ان دونوںکوآج صبح چھ بجے رینجرزنے فیڈرل بی ایریا میں ان کے گھروں پرچھاپہ مارکرگرفتارکرلیا اوران کے بارے میںکچھ نہیں بتایا جارہاہے کہ انہیں کہاں رکھاگیاہے ۔ رابطہ کمیٹی نے کہاکہ گزشتہ رات سے اب تک 13کارکنوں کوگرفتارکیاجاچکاہے جن کے بارے میں پولیس اوررینجرزکچھ بتانے کیلئے تیارنہیں ہیں ۔رابطہ کمیٹی نے مطالبہ کیاکہ مسنگ پرسن کمیٹی کے انچارج بابرانیس ، وصی احمداوردیگرگرفتارشدہ کارکنوں کوفی الفوررہاکیاجائے ۔