لندن ......متحدہ قومی موومنٹ کی رابطہ کمیٹی کے سینئرڈپٹی کنوینرندیم نصرت نے کہاہے کہ ایم کیوایم کوختم کرنے کیلئے ہم پر ظلم وستم کے پہاڑ توڑے جارہے ہیں لیکن ہماراعزم ہے کہ ہم تمام ترمظالم کے باوجود اپنی جدوجہدجاری رکھیں گے۔انہوں نے یہ بات ایم کیوایم یوتھ ونگ کے زیراہتمام اے پی ایم ایس او کے 37ویں یوم تاسیس کے اجتماع سے خطاب کرتے ہوئے کہی۔ ندیم نصرت نے کہاکہ ان دنوں ایم کیوایم کے کارکنان اوراس کی حمایت کرنے والے عوام جن حالات سے گزررہے ہیں ہم اس سے قبل بھی کئی بارگزرچکے ہیں، آج بھی ہمارے بے گناہ کارکنوںکو گرفتارکیاجارہاہے، انہیںماورائے عدالت قتل کیاجارہاہے اورہم پرریاستی مظالم ڈھائے جارہے ہیں۔ انہوں نے کہاکہ پاکستان میںسیاستدانوں کی خریدوفروخت کی جاتی ہے لیکن الطاف حسین نے اپنے ظرف وضمیراوراپنے مشن ومقصد کا سودا نہیں کیا،یہی وجہ ہے کہ پاکستان پر حکمرانی کرنے والی اصل قوتیں ایم کیوایم کوختم کردیناچاہتی ہیں۔رابطہ کمیٹی کے رکن محمدانورنےکہاکہ محروم ومظلوم بنگالی عوام کوان کے حقوق نہیں دیے گئے بلکہ انہیں ریاستی طاقت سے کچلنے کی کوششیں کی گئیں جس کے نتیجے میں پاکستان دولخت ہوگیا لیکن پاکستان کے ارباب اختیارنے اس سے کوئی سبق نہیں سیکھا اورآج بھی بلوچستان میںوہی کچھ کیاجارہاہے ، سندھ میں مہاجروں کوبھی ان کے حقوق دینے کے بجائے طاقت سے کچلنے کی کوششیںکی جارہی ہیں،این اے 246کے ضمنی انتخابات میں ایم کیوایم کی شاندارکامیابی نے ایم کیوایم کے مینڈیٹ کے بارے میں مخالفین کی جانب سے پھیلائے گئے تمام منفی پروپیگنڈوںکوجھوٹ اورغلط ثابت کردیا۔ وقت کاتقاضہ ہے کہ ایم کیوایم کے مینڈیٹ کودل سے تسلیم کیاجائے۔رکن رابطہ کمیٹی ڈاکٹرسلیم دانش نے کہاکہ تمام ایم کیوایم دشمن عناصر الطاف حسین کے فکروفلسفہ سے خوف زدہ ہیں اسی لئے انہوں نےالطاف حسین کے خطاب کوپر براہ راست نشر کرنے پرپابندی عائد کردی ہے۔ اجتماع سے یوتھ ونگ کی انچارج حبادانش، ایمان انور، کنورواسع نے بھی خطاب کیاجبکہ ارکان رابطہ کمیٹی مصطفیٰ عزیزآبادی اورقاسم علی رضانے نظمیں پیش کیں جبکہ زنیرالدین نے ترانہ پیش کیا۔ تلاوت قرآن مجید صیان خانزادہ نے کی۔اجتماع میں رابطہ کمیٹی کے ارکان واسع جلیل، انبساط ملک، ارشدحسین،رکن سندھ اسمبلی عادل صدیقی اورسی ای سی رکن محمدشریف خان بھی موجود تھے۔اس موقع پر یوم تاسیس کاکیک کاٹاگیا۔