لندن......متحدہ قومی موومنٹ کے بانی وقائدالطاف حسین نے رینجرزکے ہاتھوں کراچی میں ایم کیوایم کے کارکنوں کی مسلسل گرفتاریوں اور دفاتر پر چھاپوں پرشدیدردعمل کااظہارکیاہے۔ اپنے ایک بیان میں الطاف حسین نے کہاکہ کراچی میں رینجرزکی جانب سے بلاناغہ ایم کیوایم کے کارکنوں کے گھروں پر بناوارنٹ چھاپوں،گرفتاریوں، کارکنوںکی غیرموجودگی میں ان کے اہل خانہ کوزدوکوب کرنااورگرفتارشدگان پر بہیمانہ تشددکرکے انہیں حراست کے دوران مبینہ ماورائے عدالت قتل یامعذورکردینا روزمرہ کامعمول بن چکاہے،دہشت گردوںکی گرفتاریوںکی آڑ میں سیاسی کارکنوں کے ساتھ ایساسفاکانہ اورظالمانہ سلوک نہ صرف سراسرغیرانسانی ہے بلکہ اقوام متحدہ کے چارٹر ، آئین پاکستان اور ملکی قوانین کے بھی سراسر خلاف ہے۔انہوںنے کہاکہ ایم کیوایم کے کارکنوں اورذمہ داروںکوگرفتارکرکرکے غائب کیاجارہاہے، جب منتخب حق پرست ارکان اسمبلی ان گرفتاریوں پر رینجرز کے مقامی افسران سے رابطہ کرتے ہیں تووہ عوام کے منتخب کردہ نمائندوں کوصحیح اوراطمینان بخش جواب تک نہیں دیتے۔گرفتارشدگان کو کئی کئی مہینے لاپتہ رکھا جاتا ہے۔الطاف حسین نے صدرممنون حسین کومخاطب کرتے ہوئے کہاکہ آپ کو بطور صدرپاکستان جوتھوڑے بہت اختیارات حاصل ہیں،ان کا استعمال کرکے سندھ کے عوام کو ظلم وستم اورناجائزگرفتاریوں کے عمل سے محفوظ رکھیں۔ صدرمملکت یہ بھی یادرکھیں کہ پاکستان کے آئین اورقانون کی حرمت و پاسداری کرنا رینجرزکے لئے بھی اسی طرح ضروری ہے جس طرح کسی عام شہری کیلئے ضروری ہے۔ ملک کے دانشور،قلمکار زبانی جمع خرچ کرکے اور رینجرزکی حمایت میں تعریفی کلمات کہہ کر ایک دوسرے پر سبقت لے جانے کی کوشش کرنے کے بجائے پاکستان کی بقاء وسلامتی کی فکرکریں ۔