واشنگٹن........ امریکہ کے وزیر دفاع ایش کارٹر نے اپنے اعلی ترین فوجی معاون لیفٹیننٹ جنرل رون لیوئس کو نامناسب رویے کے الزامات پر ان کے عہدے سے ہٹا دیا ہے۔

کارٹر نے ایک مختصر بیان میں کہا کہ انہوں نے یہ معاملہ تحقیقات کے لیے پینٹاگان کے انسپکٹر جنرل کے حوالے کر دیا ہے اور حقائق کا تعین کرنے کے لیے انہیں انسپکٹر کی صلاحیت پر اعتماد ہے۔ابھی یہ نہیں بتایا گیا کہ رون لیوئس پر کس چیز کا الزام ہے۔ پینٹاگان کے ایک عہدیدار نے کہا کہ کارٹر کو منگل کو ان الزامات کے بارے میں بتایا گیا اور انہیں ان پر کافی حیرت ہوئی۔

ایشن کارٹر نے کہا کہ وہ اس محکمے سے تعلق رکھنے والے مردوں اور عورتوں سے بہترین معیار کے رویوں کی توقع رکھتے ہیں ، خصوصا ان لوگوں سے جو اعلی ترین عہدوں پر فائز ہیں۔ اس میں کسی کو استثنی حاصل نہیں ہونا چاہیئے۔اعلی ترین فوجی معاون کی حیثیت سے لیفٹیننٹ جنرل لیوئس کارٹر کے دست راست تھے جو انہیں فوجی امور پر تجزیے فراہم کرتے تھے۔

لیوئس تھری اسٹار جنرل ہیں جن کی عراق اور افغانستان میں کمانڈر اور جنگی ہیلی کاپٹر کے پائلٹ کی حیثیت سے تین مرتبہ تعیناتی ہو چکی ہے۔