کراچی.......سندھ اور پنجاب میں بلدیاتی انتخابات کے دوسرے مرحلے کے لیے کل پولنگ ہوگی۔ پولنگ صبح ساڑھے 7بجے شروع ہوگی جو بغیر کسی وقفے کے شام ساڑھے پانچ بجے تک جاری رہے گی۔

سندھ اورپنجاب میں بلدیاتی انتخابات کے دوسرے مرحلے کےلئے کل میدان سجے گا۔ پولنگ کے تمام انتظامات مکمل کرلئے گئے ہیں۔ پولنگ میٹریل کی ترسیل کا عمل مکمل کرلیا گیا ہے۔

پنجاب کے 12 اور سندھ کے 14 اضلاع میں پولنگ ہوگی۔ پنجاب میں اٹک، جہلم، میانوالی،حافظ آباد، منڈی بہاء الدین، گوجرانوالہ، ساہیوال،خانیوال، چنیوٹ، سرگودھا، شیخوپورہ اور ٹوبہ ٹیک سنگھ کے عوام حق رائے دہی استعمال کریں گے۔

سندھ کے 14 اضلاع حیدرآباد، ٹھٹھہ، سجاول، مٹیاری، جام شورو، دادو، بدین، ٹنڈو محمد خان، ٹنڈو الہٰ یارمیرپورخاص، نواب شاہ،نوشہروفیروز، عمرکوٹ اور تھرپارکر میں انتخابی معرکہ ہوگا۔

پولنگ کے دوران سیکورٹی کے سخت انتظامات کئے گئے ہیں، پولیس اور رینجرز کے دستے تعینات کئے گئے ہیں جبکہ فوج کو بھی اسٹینڈ بائی رکھا گیا ہے۔

پاک فوج اور پولیس نے مختلف علاقوں میں فلیگ مارچ بھی کیا۔پولنگ کے دوران کسی بھی شخص کو لائسنس اسلحہ لے کر گھومنے کی بھی اجا ز ت نہیں ہو گی۔