دبئی......... ایران کے معزول بادشاہ محمد رضا پہلوی کی جڑواں بہن شہزادی اشرف پہلوی 96 برس کی عمر میں انتقال کرگئیں۔

امریکی خبر رساں ادارے کے مطابق مرحوم محمد رضا پہلوی کے بیٹے نے فیس بک پر شہزادی اشرف پہلوی کی وفات کا اعلان کیا تاہم ان کی موت کی وجہ نہیں بتائی گئی۔شہزادی اشرف 26 اکتوبر 1919 کو پیدا ہوئی تھیں۔نیویارک ٹائمز کی رپورٹ کے مطابق اشرف پہلوی کے مشیر روبرٹ ایف ارما نے بتایا کہ ان کی موت بڑھاپے کے باعث ہوئی۔

ارما نے بتایا کہ شہزادی اشرف اپنے گھر میں نیند کی حالت میں مردہ پائی گئیں تاہم انھوں نے ملک کا نام بتانے سے گریز کیا اور اس کی وجہ شہزادی کے خاندان کو درپیش سکیورٹی کے مسائل بتائے۔1979 میں بھائی کو معزول کیے جانے کے بعد شہزادی اشرف پہلوی پیرس، نیویارک اور مانٹی کارلو میں گھر تبدیل کرتی رہیں۔

شاہ کی معزولی کے بعد انہوں نے کافی آواز اٹھائی اور 1990 کی دہائی میں اپنی یادداشتیں بھی شائع کیں، لیکن اس کے بعد وہ منظر عام سے غائب ہوگئیں۔روبرٹ ایف ارما کے مطابق شہزادی نے سوگوران میں ایک بیٹے پرنس شہرام پہلوی، 5 پوتے پوتیوں اور متعدد پڑ پوتوں، پڑپوتیوں کو چھوڑا ہے۔