وزیراعلیٰ سندھ نے ڈسٹرکٹ میونسپل کارپویشنز کو صفائی کیلئے 48 گھنٹے کا الٹی میٹم دے دیا۔وزیر اعلیٰ سندھ مراد علی شاہ کا نیو سندھ سیکرٹریٹ اجلاس میں کہنا ہے کچرا نہ اٹھایا گیا تو متعلقہ ڈی ایم سیز کو تبدیل کردیا جائیگا۔

وزیراعلیٰ سندھ مراد علی شاہ کی زیر صدارت نیو سندھ سیکرٹریٹ میں کراچی میں صفائی کی صورتحال پر اہم اجلاس میں کئی اہم فیصلے کیے گئے، وزیر اعلیٰ نے تمام ڈسٹرکٹ میونسپل کارپویشنز کوصفائی کے لئے 48 گھنٹےکا الٹی میٹم دے دیا ۔ ان کا کہنا ہے کچرا نہ اٹھایا گیا تو متعلقہ افسر گھر جائے گا، ملیر ندی ، قیوم آباد کے گراؤنڈز میں کچرا پھینکا گیا تو پولیس ذمہ دار ہو گی ۔

وزیر اعلیٰ سندھ مراد علی شاہ کی صدارت میں نیو سندھ سیکرٹریٹ اجلاس جاری ہے ۔ یہ پہلاموقع ہے کہ وزیر اعلیٰ سندھ کی صدارت میں اجلاس صبح 8 بجے وقت پراجلاس شروع ہوا ۔ وزیر اعلیٰ پونے آٹھ بجے پہنچ گئے تھے لیکن بعض متعلقہ افسر تاخیر سے پہنچے۔

اجلاس سے خطاب کرتے ہوئے وزیر اعلیٰ کا کہنا تھا میں باتوں سے زیادہ کام پر یقین رکھتا ہوں ، بریفنگ نہیں نتائج چا ہیے۔ ان کا کہنا تھا کہ کراچی میں کچرے کے حوالے سے بہت شکایات ہیں ۔ کھلے میدانوں میں کچرا پھینکا جا رہا ہے ۔ میدانوں میں کچرا پھینکنے کی اجازت نہیں دوں گا ۔ کچرا ٹھکانے لگانے کی جگہ کا تعین کر کے بتایا جائے ۔ پورے ریڈ زون کو ہنگامی بنیادوں پر صاف کیا جائے ۔ کورنگی روڈ کی صفائی بھی کل سے شروع کی جائے ۔

انہوں نے مزید کہا کہ ضلع جنوبی میں 2400 خاکروب کی آسامیاں ہیں، صرف 1039 خاکروب کام کر رہے ہیں ۔ ضلع سینٹرل نے 250 ڈسٹ بن کے آرڈرز دئیے ہیں ۔