لاہور… پنجاب کے سرکاری اسپتالوں میں ینگ ڈاکٹرزکی ہڑتال آج14ویں روزبھی جاری ہے ، ہڑتال ختم کرانے کیلئے سینئر ڈاکٹرز بھی میدان میں آ گئے،جن کی آج ینگ ڈاکٹرز کے نمائندوں سے ملاقات ہو گی ،دوسری جانب پنجاب حکومت نے پیرکے روزآوٴٹ ڈورز کھولنے کیلئے متبادل انتظامات مکمل کر لئے ہیں، اور گوجرانوالہ میں آرمی ڈاکٹرز نے او پی ڈی میں معائنہ شروع کر دیا ہے۔ پروفیسرڈاکٹرطارق صلاح الدین، ڈاکٹرجاویداکرم اورڈاکٹر فیصل مسعود سمیت متعددسینئرڈاکٹرزکی آج جنرل اسپتال میں ینگ ڈاکٹرز سے ملاقات ہوگی۔ ذرائع کے مطابق سینئر ڈاکٹرز نے گزشتہ روز وزیر اعلیٰ پنجاب کو ہڑتال ختم کرانے کاعندیہ دیاتھااورکہاتھاکہ وہ مزیدکسی بدمزگی سے بچنے کے لیے غیر مشروط طور پر ہڑتال ختم کرانیکی کوشش کریں گے۔دوسری جانب پنجاب حکومت کی جانب سے نئی بھرتی ہونے والی 454 ڈاکٹرز کو مختلف اسپتالوں میں تعینات کیا جائے گا ۔ ادھر گوجرانولہ میں پاک آرمی کے 15ڈاکٹرز نے اتوار کو بھی او پی ڈی کھول دی ہے۔ ملتان اور فیصل آباد کی او پی ڈی میں آج چودہویں روز بھی کوئی ینگ ڈاکٹر موجود نہیں ہے۔گوجرانولہ میں پاک آرمی کے15 ڈاکٹرز پہنچ گئے اور انہوں نے اتوار کے روز بھی ڈسٹرکٹ ہیڈ کوارٹر اسپتال کی او پی ڈی کھول دی ہے۔ اوپی ڈی میں سینیئر ڈاکٹرز بھی موجود ہیں۔ ڈاکٹرز کی چھٹیاں منسوخ ہونے کے باجود بھی فیصل آباد کے سرکاری اسپتالوں کے اوپی ڈی میں کام بند ہے اور کوئی بھی ڈاکٹر ڈیوٹی پر موجود نہیں ہے۔ ملتان میں بھی ینگ ڈاکٹرز ایسوسی ایشن کی ہڑتال جاری ہے، گزشتہ روز حکومت پنجاب کے احکامات کے باجود کسی بھی سرکاری اسپتال کی او پی ڈی میں ڈاکٹرز موجود نہیں ہیں۔ بہاول پور کے وکٹوریہ اسپتال میں بھی صورتحال مختلف نہیں ہے۔یہاں بھی ڈاکٹرز کی ہڑتال نے مریضوں کی مشکلات میں اضافہ کردیا ہے۔