انتظار کا قتل منصوبہ بندی کے تحت کیا گیا، مدیحہ کیانی کا دعویٰ

کراچی: انتظار قتل کیس کی واحد عینی شاہد مدیحہ کیانی نے اپنے پہلے ویڈیو بیان میں نوجوان کے قتل کو 'سوچا سمجھا منصوبہ' قرار دے دیا اور تفتیشی عمل پر سوالات اٹھاتے ہوئے رینجرز سے تحفظ کی اپیل کردی۔

13 جنوری کو ڈیفنس کے علاقے خیابان اتحاد میں پولیس اہلکاروں کی فائرنگ سے قتل ہونے والے 19 سالہ نوجوان انتظار کی دوست اور قتل کی واحد عینی شاہد مدیحہ کیانی کا پہلا ویڈیو بیان منظر عام پر آگیا۔

مدیحہ کیانی نے مقتول انتظار کے والد کے ہمراہ ویڈیو بیان میں کہا کہ انہیں لگتا ہے کہ انتظار کا قتل منصوبہ بندی کے تحت کیا گیا۔

مدیحہ کا کہنا تھا، 'لگتا ہےکہ یہ قتل کسی بااثر شخص نےکسی اور سے کروایا ہے۔'

خاتون کے مطابق 'انتظار نے کہا تھا کہ میری گاڑی کی نشاندہی ہوئی ہے اور گاڑی کا تعاقب کیا جاتا ہے'۔

مدیحہ کے مطابق 'قتل والے روز انتظار نے مجھے جلدی گھر جانے کو کہا، مجھے لگا کہ اس کے دماغ میں ایسی بات تھی جس سے اس کو خطرہ محسوس ہوا'۔

مدیحہ کیانی نےانکشاف کیا کہ واقعے کے روز سلمان نامی نوجوان عصر کے وقت ہمیں ملا ، جس کا انداز بہت مشکوک تھا، سلمان کے ساتھ احمد رند نامی ایک اور شخص بھی تھا۔

مدیحہ کیانی نے کہا کہ 'سچ سامنے لانا ہے تو ماہ رخ نامی لڑکی سمیت اعلیٰ شخصیات سے بھی مکمل تفتیش ہونی چاہیے'۔

خاتون نے اپنے ویڈیو بیان میں کہا کہ وہ سامنے اس لیے نہیں آرہی تھی کہ طاقتور لوگوں کے نام سامنے آرہے تھے۔

مدیحہ نے بتایا کہ 'میں انتظار سے ماہ رخ کے بارے میں پوچھتی تھی، جس پر انتظار نے مجھے بتایا کہ گھر والے نہیں مانے'۔

مدیحہ کے مطابق 'انتظار نے مجھے بتایا کہ ماہ رخ کا رشتے دار عامر حمید ہے اور وہ بڑے لوگ ہیں'۔

ذرائع کے مطابق مقتول انتظار کی ماہ رخ نامی لڑکی سے اسکول سے دوستی تھی، جس کے بارے میں ذرائع کا دعویٰ ہے کہ وہ سابق ڈی ایس پی ایس آئی یو عامر حمید کی بھتیجی ہے۔

عامر حمید اس وقت ایس ایس پی انویسٹی گیشن ساؤتھ فاروق اعوان کے پی ایس او ہیں، تاہم ان کا کہنا ہے کہ ماہ رخ ان کی بھتیجی نہیں ہے اور نہ ہی ان کا انتظار کے معاملے سے کوئی تعلق ہے۔

انتظار قتل کیس: بیٹے کے قتل کے کئی شواہد مٹا دیے گئے، اشتیاق احمد

نئی جے آئی ٹی نہیں بنائی گئی، ماہ رخ اور مقدس حیدر کے رشتے سے متعلق تحقیقات کی جائے، والد مقتول انتظار احمد

مدیحہ کیانی نے یہ انکشاف بھی کیا کہ ان کے پہلے بیان میں پولیس نے وہ باتیں بھی شامل کیں جو انہوں نےکہی ہی نہیں تھیں۔

ویڈیو بیان میں مدیحہ کیانی نے رینجرز سے اپیل کی کہ وہ اس مقدمے کی واحد گواہ ہیں، لہذا انہیں تحفظ دیا جائے۔

ویڈیو بیان میں مدیحہ کیانی کے ہمراہ موجود انتظار کے والد نے کہا کہ مدیحہ نے ان سے رابطہ کر کے کہا کہ وہ واقعے سے متعلق سچ بتا کر دل کا بوجھ ہلکا کرنا چاہتی ہے۔

انتظار کے والد نے بھی اپیل کی کہ قتل کیس کی واحد گواہ کو تحفظ فراہم کیا جائے۔ 

ان کا مزید کہنا تھا کہ 'اہلکاروں نے میرے بیٹے کو شناخت کرنے کے بعد گولیاں چلائیں، واقعے کی سی سی ٹی وی ویڈیو اور تصاویر دیکھ لیں کہ یہ ٹارگٹ ہے یا غفلت'۔

کاظم پاشا کا ویڈیو بیان

مدیحہ کیانی کو انتظار کے والد کے پاس لےکر جانے والے کاظم پاشا کا دعویٰ ہے کہ مدیحہ کو پولیس اپنے ہمراہ لے گئی ہے۔

جبکہ جے آئی ٹی کے سربراہ ثناء اللہ عباسی نے جیونیوز کو بتایا ہے کہ مدیحہ کو بیان کےلیے بلوایا گیا جس میں وہ ڈری ہوئی لگ رہی تھی، بیان کے بعد وہ واپس چلی گئی۔

انھوں نے مزید بتایا کہ جمعرات کی سہہ پہر 3 بجے تمام لوگوں کو طلب کر لیا گیا ہے تاکہ جے آئی ٹی کو مکمل کیا جاسکے۔

انتظار قتل کیس

یاد رہے کہ گذشتہ ماہ 13 جنوری کو ڈیفنس کے علاقے خیابان اتحاد میں اینٹی کار لفٹنگ سیل کے اہلکاروں کی فائرنگ سے 19 سالہ نوجوان انتظار احمد ہلاک ہوگیا تھا، جس کے بعد نوجوان کے والد نے چیف جسٹس آف پاکستان اور آرمی چیف سے انصاف کی اپیل کی تھی۔

مقتول انتظار کے والد کی پریس کانفرنس پر وزیراعلیٰ سندھ سید مراد علی شاہ نے واقعے کا نوٹس لیا تھا اور واقعے کا مقدمہ بھی درج کرلیا گیا تھا۔

پولیس نے ابتدائی طور پر بیان دیا تھا کہ اینٹی کار لفٹنگ سیل (اے سی ایل سی) کے اہلکاروں نے گاڑی مشکوک سمجھ کر اسے رکنے کا اشارہ کیا اور نہ رکنے پر فائرنگ کی گئی جس سے نوجوان ہلاک ہوگیا۔

انتظار کو 'جان بوجھ' کر قتل کیا گیا، پولیس اہلکار واقعے میں براہ راست ملوث: سی ٹی ڈی

ایس ایس پی مقدس حیدر پر قتل کی سازش یا منصوبہ بندی کے ابھی تک ٹھوس شواہد نہیں ملے، سی ٹی ڈی کی تحقیقاتی ٹیم کا تفتیش مکمل کرنے کا اعلان

پولیس کی تحقیقات کے مطابق جائے وقوعہ سے گولیوں کے 16 خول ملے تھے جب کہ مقتول کی گاڑی میں ایک لڑکی موجود تھی جو بعد میں رکشے میں چلی گئی، اس لڑکی کی شناخت بعد میں مدیحہ کیانی کے نام سے ہوئی۔

مدیحہ کیانی نے اپنے بیان میں بتایا تھا کہ اس کی ایک ہفتہ پہلے ہی انتظار سے دوستی ہوئی تھی اور اس نے فائرنگ کرنے والوں کو نہیں دیکھا۔

فائرنگ کے واقعے میں ایس ایس پی اینٹی کار لفٹنگ سیل مقدس حیدر کے گن مین براہ راست ملوث شامل تھے جب کہ اس کیس میں 9 پولیس افسران اور اہلکار گرفتار ہیں۔

بعدازاں انتظار احمد کی ہلاکت کی تحقیقات کے لیے جے آئی ٹی بنائی گئی، جس میں پولیس، رینجرز، سی ٹی ڈی اور حساس اداروں کے نمائندے شامل تھے، تاہم جے آئی ٹی پر مقتول کے والد نے عدم اعتماد کا اظہار کیا، جس پر 16 فروری کو نئی جی آئی ٹی تشکیل دے دی گئی۔