پولیس اہلکاروں سے بدتمیزی کرنے والی ڈاکٹر شہلا کی ضمانت منظور

اسلام آباد میں پولیس اہلکاروں سے بدتمیزی کرنے والی خاتون ڈاکٹر شہلا کی درخواست ضمانت منظور کرلی گئی۔

جوڈیشل مجسٹریٹ ثاقب جواد نے محفوظ فیصلہ سنادیا اور نے 50 ہزار روپے کے ضمانتی مچلکوں کے عوض خاتون کو رہا کرنے کا حکم دیا۔

خیال رہے کہ 17 اکتوبر کو پیش آنے والے اس واقعے کا مقدمہ ڈپلومیٹک انکلیو کی ڈیوٹی پر تعینات پولیس افسر کی جانب سے تھانہ سیکرٹریٹ میں درج کروایا گیا تھا۔

ڈپلومیٹک انکلیو میں پولیس کو دھمکیاں دینے والی خاتون کا 14 روزہ جوڈیشل ریمانڈ

تفتیشی افسر ملزمہ کا طبی معائنہ کرائیں، اگرصحت مند قرار دیا جائے تو جیل بھجوا دیں اور اگر ڈاکٹر تجویز کرتے ہیں تو اسپتال میں داخل کرادیں، ڈیوٹی جج نے درخواست ضمانت مسترد کردی۔

مذکورہ پولیس افسر نے درخواست میں مؤقف اختیار کیا تھا کہ ڈاکٹر شہلا نامی خاتون نے بغیر نمبر پلیٹ والی گاڑی کے ساتھ ڈپلومیٹک انکلیو کے اندر جانے کی کوشش کی اور روکنے پر پولیس اہلکاروں کے ساتھ نہ صرف بدتمیزی کی بلکہ انہیں گاڑی اوپر چڑھانے اور سنگین نتائج کی دھمکیاں بھی دیں۔

ڈاکٹر شہلا شکیل پر کارِ سرکار میں مداخلت اور اہلکاروں کو دھمکیاں دینے کا الزام ہے۔ ذرائع کے مطابق شہلا شکیل سیٹھی امریکا میں ڈاکٹر رہی ہیں، جو حال ہی میں وطن آئی ہیں۔

اسلام آباد کی مقامی عدالت نے ڈاکٹر شہلا کو 14 روزہ جوڈیشل ریمانڈ پر جیل بھیجنے کا حکم دیا تھا تاہم ان کے وکیل نے ضمانت کی درخواست دائر کردی تھی۔