کھیل

ملتان سلطانز نے اسلام آباد یونائیٹڈ کو 5 وکٹوں سے شکست دیدی

16 فروری ، 2019

سلطانز کی جانب سے شعیب ملک 31 اور شان مسعود 26 رنز بناکر نمایاں رہے— فوٹو: پی ایس ایل آفیشل

دبئی: پاکستان سُپر لیگ کے چوتھے میچ میں ملتان سلطانز نے اسلام آباد یونائیٹڈ کو 5 وکٹوں سے شکست دے دی۔

دبئی کے انٹرنیشنل کرکٹ اسٹیڈیم میں کھیلے گئے میچ میں ملتان سلطانز کے کپتان شعیب ملک نے ٹاس جیت کر اسلام آباد یونائیٹڈ کو پہلے بیٹنگ کی دعوت دی۔

محمد عرفان اسلام آباد کے ڈیلپورٹ کا کیچ تھامتے ہوئے۔ فوٹو: پی ایس ایل

اسلام آباد کی جانب سے لیوک رونکی کے علاوہ کوئی بھی بلے باز اچھی کارکردگی نہ دکھا سکا۔ لیوک رونکی نے 5 رنز کی اننگز کھیلی۔

آخری اوورز میں سمت پٹیل اور فہیم اشرف نے 20، 20 رنز بنا کر اپنی ٹیم کا اسکور تھوڑا آگے بڑھایا اور اسلام آباد کی ٹیم مقررہ اوورز میں 7 وکٹوں کے نقصان پر 125 رنز بنا پائی۔

ملتان کی جانب سے علی شفیق، شاہد آفریدی اور جنید خان نے دو دو کھلاڑیوں کو آؤٹ کیا جب کہ محمد عرفان کے حصے میں ایک وکٹ آئی۔

126 رنز کے ہدف کے تعاقب میں ملتان سلطانز کی جانب سے اننگز کا آغاز شان مسعود اور جان کارلس نے کیا لیکن اوپنر ٹیم کو مستحکم آغاز دینے میں ناکام رہے۔

ملتان الیون کے کپتان شعیب ملک نے ذمہ دارانہ بیٹنگ کی جب کہ شاہد آفریدی نے 19 ویں اوور میں 2 چھکے لگا کر ٹیم کو فتح دلائی۔

ملتان سلطانز نے 5 وکٹوں کے نقصان پر ہدف حاصل کیا، شعیب ملک 31، شان مسعود 26 اور شاہد آفریدی 16 رنز بناکر نمایاں رہے۔

اسلام آباد یونائیٹڈ کی جانب سے شاداب خان نے 2، وقاص مقصود اور محمد سمیع نے ایک ایک کھلاڑی کو آؤٹ کیا۔

ملتان سطانز کی ایونٹ میں پہلی فتح ہے اور اس سے قبل ایک میچ ٹیم ہار چکی ہے جب کہ اسلام آباد یونائیٹڈ کو بھی ایک میچ میں کامیابی اور ایک میں شکست کا سامنا کرنا پڑا ہے۔