عید کے معاملے پر پی ٹی آئی وزرا آمنے سامنے، کے پی حکومت کا کفارہ ادا کرنے کا اعلان

لاہور/پشاور: خیبرپختونخوا میں ایک روز پہلے سرکاری طور پر عید کے اعلان پر وزیر سائنس و ٹیکنالوجی فواد چوہدری اور صوبائی وزیر اطلاعات کے پی کے شوکت یوسفزئی آمنے سامنے آگئے جب کہ صوبائی حکومت نے ایک روزے کا کفارہ ادا کرنے کا اعلان کردیا۔

جیو نیوز سے بذریعہ ٹیلی فون خصوصی بات کرتے ہوئے فواد چوہدری کا کہنا تھا کہ خیبرپختونخوا حکومت کا آج عید منانے کا فیصلہ نامناسب ہے اور اس سے جگ ہنسائی ہوئی ہے۔

فواد چوہدری نے کہا کہ گزشتہ روز چاند کا نظر آنا ممکن ہی نہیں تھا، مذہبی تہوار کی بنیاد بھی جھوٹ پر رکھ دی گئی ہے، دنیا میں ایسے تاثر گیا کہ جیسے جھوٹ کو سرکاری سرپرستی حاصل ہے۔

انہوں نے کہا کہ حکومتیں مسلک اور مقامی لڑائیوں میں نہیں پڑتیں، جو جہاں چاہے عید کرے مگر جھوٹ کی بنیاد پر نہیں۔

فواد چوہدری نے کہا کہ جہالت کا علاج حکیم لقمان کے پاس بھی نہیں تھا، پرنٹنگ پریس اور ریلوے کا سفر برسوں تک حرام قرار دیا گیا جب کہ لاؤڈ اسپیکر کو حلال کرتے کرتے کئی سال لگ گئے، چاند کا مسئلہ بھی حل ہو ہی جائے گا۔

وفاقی وزیر کا کہنا تھا کہ ہمیں اپنے گریبان میں جھانکنا چاہیے، جو ملک ہمارے ساتھ آزاد ہوئے وہ آج کہاں کھڑے ہیں، معاشرے نئی سوچ کی قیادت میں آگے بڑھتے ہیں، امید ہے قوم کا باشعور طبقہ ہر معاملے پر خاموش نہیں رہے گا۔

فواد چوہدری نے کہا کہ پسماندہ سوچ کو مستر د کرنا چاہیے، پاکستان میں بھی آخری فتح علم اور عقل کی ہونی ہے۔

خیبرپختونخوا میں سرکاری سطح پر عید الفطر منانے کے اعلان کے بعد وفاقی وزیر نے ان خیالات کا اظہار جمیل سومرو نامی ٹوئٹر صارف کی جانب سے استعفے کے مطالبے کا جواب دیتے ہوئے بھی کیا تھا۔ 

ایک روزے کا کفارہ ادا کریں گے: شوکت یوسفزئی

دوسری جانب جیونیوز سے خصوصی گفتگو کرتے ہوئے وزیراطلاعات خیبرپختونخوا شوکت یوسفزئی نے وزیر سائنس اینڈ ٹیکنالوجی فواد چوہدری کو تنقید کا نشانہ بنایا۔

شوکت یوسفزئی نےکہا کہ مفتی فواد کو مشورہ دیتا ہوں کہ وہ اپنے کام پر توجہ دیں، فواد چوہدری حکومت اور علماء کو ٹارگٹ نہ کریں۔

وزیراطلاعات نے بتایا کہ صوبے میں عید کے اعلان سے پہلے وزیراعظم عمران خان کو بتایا گیا جس پر وزیراعظم نے جواب دیا کہ آپ کا معاملہ ہے آپ بہتر سمجھتے ہیں، مفتی منیب کے کہنے پر روزہ رکھا مگر ایک دن پہلے والا روزہ ٹھیک تھا، ایک روزے کا کفارہ ادا کریں گے اور دوبارہ رکھیں گے۔

مفتی منیب پر بھی تنقید

ان کاکہنا تھا کہ یہ غلط فہمی ہے کہ مفتی شہاب الدین کے کہنے پر عید کا اعلان کیا، مفتی منیب الرحمان نے فواد چوہدری کی ایک عید کی کوششوں پر اعتراض کیا، مفتی منیب کہتے ہیں کہ چاند دیکھنے میں سائنس کا کیا کام ہے، مفتی منیب کے بی آر ٹی کے متعلق بیان سے ان کی مایوسی کا پتہ چلتا ہے، وہ دلائل چھوڑ کر کہتے ہیں صوبائی حکومت نہیں چل سکتی یہ کیا بات ہوئی۔

شوکت یوسفزئی نے مزید کہا کہ رویت ہلال کمیٹی میں بھی اختلافات ہیں، ہر چیز میں ریٹائرمنٹ ہوتی ہے لہٰذا مفتی منیب کمیٹی سے الگ ہوجائیں۔

یاد رہے کہ پشاور کی غیر سرکاری رویت ہلال کمیٹی کے سربراہ مفتی شہاب الدین پوپلزئی نے گزشتہ روز شوال کا چاند نظر آنے کا اعلان کیا تھا جس کی توثیق صوبائی حکومت نے بھی کی اور صوبے میں سرکاری طور پر عید منانے کا اعلان کیا۔