سندھ کے بعد پنجاب میں بھی شاپنگ مالز اور بڑے پلازہ کھولنے کی اجازت
20 مئی ، 2020
سندھ کے بعد پنجاب حکومت نے بھی شاپنگ مالز اور بڑے پلازوں سمیت دیگر مارکیٹس کو پورا ہفتہ کھولنے کی اجازت دے دی۔
پنجاب حکومت کی کیبنٹ کمیٹی برائےانسدادکورونا کی ہدایت پرسیکرٹری پرائمری اینڈ سیکنڈری ہیلتھ کیئر کیپٹن ریٹائرڈ محمد عثمان نے شاپنگ مالز اور بڑے پلازوں سمیت دیگر مارکیٹس کو کھولنے کا نوٹیفکیشن جاری کردیا۔
نوٹیفکیشن کے مطابق صوبے میں تمام شاپنگ مالز اور پلازے ہفتےکے 7 روز صبح 9 سے شام 5 بجے تک کھلے رہیں گے جب کہ شاپنگ مالز اور بڑے پلازوں میں قائم فوڈ کورٹ اور پلے ایریاز بند رہیں گے۔
نوٹیفکیشن میں کہا گیا ہے کہ تمام شاپنگ مالز اورپلازوں میں ایس او پیزپر عمل درآمدکرنا لازم ہو گا۔
سیکرٹری پرائمری اینڈ سکینڈری ہیلتھ کیئر کے مطابق شاپنگ مالز اور پلازوں کے لیے قواعد وضوابط بھی نوٹیفکیشن کےساتھ ہی جاری کیےگئے ہیں۔
خیال رہے کہ کورونا وائرس ازخود نوٹس کیس کی سماعت کے دوران سپریم کورٹ نے ملک بھر میں چھوٹی مارکیٹیں ہفتے اور اتوار کو بھی کھلی رکھنے اور شاپنگ مالز کو بھی کھولنے کا حکم دیا تھا۔
اپنے تحریری حکم نامے میں عدالت عظمیٰ کا کہنا تھا کہ سندھ میں شاپنگ مالز بند رکھنے کی کوئی وجہ نظر نہیں آتی، سندھ حکومت شاپنگ مالز کھولنے کے لیے وفاقی حکومت سے رجوع کرے۔
