کراچی…متحدہ قومی موومنٹ کے قائدالطاف حسین نے اقوام متحدہ،او آئی سی اورعالمی برادری سے کہاہے کہ وہ نبی اکرم حضرت محمدمصطفےٰ کے بارے میں گستاخانہ فلم اور توہین آمیزخاکے یاکارٹون بنانے کافوری نوٹس لے ،اگرعالمی برادری نے اس عمل کانوٹس نہ لیااوران گستاخیوں کاعمل جاری رہاتو کہیں ایسا نہ ہوکہ دنیاکوتیسری عالمگیرجنگ کاسامنا کرنا پڑجائے۔ انہوں نے گستاخانہ فلم کے خلاف پرتشدداحتجاج کرنے والوں سے دردمندانہ اپیل کرتے ہوئے کہا اگرآپ کوسرکاردوعالم سے ذرہ برابربھی محبت ہے توکسی کی جان ومال کونقصان نہ پہنچائیں اوراپنے احتجاج کوہرقیمت پر پرامن رکھیں۔انہوں نے ان خیالات کااظہارآج گستاخانہ فلم کے خلاف متحدہ بین المسلمین فورم کے زیراہتمام ہونے والے پرامن احتجاجی مظاہرے سے فون پر خطاب کرتے ہوئے کیا ۔ احتجاجی مظاہرے میں تمام مکاتب فکرسے تعلق رکھنے والے علمائے کرام ،زاکرین، نوجوان ، بزرگ اورخواتین بھی شریک تھیں۔مظاہرے میں مسلمانوں کے ساتھ ساتھ مسیحی،ہندو،سکھ مذاہب سے تعلق رکھنے والے افرادبھی شریک تھے ۔اجتماع سے اپنے خطاب میں الطاف حسین نے کہاکہ جونبی کریم کورحمت اللعالمین مانتاہے اس کیلئے یہ گستاخانہ فلم انتہائی ناقابل برداشت اورناقابل قبول ہے یہی وجہ ہے کہ آج پاکستان سمیت پوری مسلم دنیا میں مسلمان سراپااحتجاج ہیں۔انہوں نے گستاخانہ فلم کے خلاف احتجاج کے دوران ملک کے مختلف شہروں میں ہونے والی فائرنگ،گاڑیوں،بینکوں اور املاک کونقصان پہنچانے کے واقعات پر شدیدافسوس کااظہارکرتے ہوئے کہاکہ جن شیطانوں نے یہ شیطانی فلم بنائی ان کے خلاف احتجاج ضرورکیا جائے لیکن احتجاج کایہ کونساطریقہ ہے کہ اپنے ہی لوگوں پر گولیاں چلائی جائیں،اپنے لوگوں کی زندگیوں کے چراغ گل کئے جائیں، اپنی ہی املاک کونقصان پہنچایا جائے، لوٹ مارکی جائے اورآگ لگادی جائے۔اب تک اس پرتشدداحتجاج کے نتیجے میں کئی پولیس اہلکاروں سمیت کئی بے گناہ افرادجاں بحق اورکئی زخمی ہوچکے ہیں جبکہ درجنوں نجی املاک کوتباہ کیاجاچکاہے ۔انہوں نے سوال کیاکہ آخریہ رسول سے کونسی محبت ہے؟ہمارے نبی تورحمت اللعالمین ہیں،سارے جہانوں کیلئے آپ کوعاشق رسول کہتے ہیں مگرکیاہم نے پرتشدداحتجاج کرکے اورلوگوں کی جانوں اوراملاک کونقصان پہنچاکرعشق رسول کامظاہرہ کیاہے یاخودرسول کی شان میں گستاخی کے مرتکب ہورہے ہیں؟ انہوں نے پرتشدداحتجاج کرنے والوں سے اپیل کی کہ اگرآپ کوسرکاردوعالم سے ذرہ برابر بھی محبت ہے تواپنے لوگوں کی جان ومال کونقصان نہ پہنچائیں،احتجاج پرامن اندازمیں کریں۔پولیس ، لاء انفورسمنٹ ایجنسیز کے اہلکاروں ، سفارتخانوں اوراملاک پر حملے کرنا مسئلے کاحل نہیں، مسئلے کاحل پرامن احتجاج ہے۔ الطاف حسین نے اقوام متحدہ،او آئی سی اورعالمی برادری سے کہا کہ وہ گستاخانہ فلم اور توہین آمیزخاکے یاکارٹون بنانے کافوری نوٹس لے ،اگرعالمی برادری نے اس عمل کانوٹس نہ لیااوران گستاخیوں کاعمل جاری رہاتو کہیں ایسا نہ ہوکہ یہ عمل پوری دنیامیں مسلمانوں کے جذبات کومزیدبھڑکادے اور دنیاکوتیسری عالمگیرجنگ کاسامنا کرنا پڑجائے۔انہوں نے تمام اسلامی ممالک کے سربراہوں سے بھی وہ حق بات کہیں چاہیں ان کی حکومتیں اورسلطنتیں چلی جائیں۔انہوں نے صدرآصف زرداری سے بھی مطالبہ کیاکہ وہ اقوام متحدہ کی جنرل اسمبلی میں اس مسئلے کو اٹھائیں اورعالمی برادری کو قوم کے جذبات سے آگاہ کریں۔ انہوں نے پرامن احتجاج کرنے پر متحدہ بین المسلمین فورم میں شامل تمام علمائے کرام ، زاکرین اورتمام مذاہب اورمسالک سے تعلق رکھنے والے عوام نوجوانوں، بزرگوں اورخواتین کوزبردست خراج تحسین پیش کیا۔ انہوں نے پرتشدداحتجاج کے دوران شہیدہونے والوں کیلئے دعائے مغفرت کی ، ان کے لواحقین سے دلی تعزیت کااظہارکیااوردعاکی کہ اللہ تعالیٰ فسادبرپاکرنے والے عناصرکوہدایت دے۔