ہاکی فیڈریشن کا بھارت میں ہونیوالے جونیئر ہاکی ورلڈکپ میں شرکت کیلئے حکومت کو خط

پاکستان ہاکی فیڈریشن (پی ایچ ایف) نے بھارت میں ہونے والے جونیئر ہاکی ورلڈکپ میں شرکت کیلئے حکومت کو خط لکھ دیا۔

پی ایچ ایف کے سیکرٹری آصف باجوہ کا کہنا ہے کہ پاکستان نے بھارت میں ہونے والے جونیئر ہاکی ورلڈکپ کے لیے کوالیفائی کیا ہوا ہے، اس موقع سے فائدہ اٹھانا اور جونیئر ورلڈکپ میں شرکت کرنا چاہتے ہیں۔

انہوں نے کہا کہ این او سی کے لیے حکومت کو لکھ دیا ہے لہٰذا جو فیصلہ حکومت کرے گی اس پر عمل کریں گے۔

ایشین ہاکی چیمپئنز ٹرافی کی نئی تاریخوں کا اعلان کردیا گیا

ڈھاکا میں ہونیوالے ایونٹ میں پاکستان، بھارت، بنگلا دیش، ملائیشیا، جاپان اور کوریا کی ٹیمیں شریک ہوں گی۔

آصف باجوہ کا کہنا تھا ہم چاہتے ہیں کہ جونیئر ورلڈکپ کھیلیں تاکہ کھلاڑیوں کو اپنی صلاحیتیوں کے اظہار کا موقع ملے، گزشتہ ورلڈکپ نہیں کھیل سکے تھے ، اس لیے یہ موقع ضائع نہیں کرنا چاہتے، اگر چہ ہمارے میزبان ملک کے ساتھ سفارتی تعلقات اچھے نہیں لیکن شرکت کی اجازت دینا حکومتی فیصلے سے مشروط ہے۔ 

انہوں نے مزید کہا کہ پی ایچ ایف کو 23 ستمبر کو ایف آئی ایف کی جانب سے جونیئر ورلڈکپ سے متعلقہ 2 ای میل موصول ہوئیں، پہلی ای میل کے ذریعے ایونٹ کے مقام اور انعقاد کی تصدیق کی گئی جب کہ دوسری ای میل میں بتایا گیا کہ 24ستمبر  بھارتی ویزاکی  درخواست کے لیے آخری تاریخ ہے لیکن اس ڈیڈ لائن تک درخواستیں جمع کرنا ممکن نہیں تھا ، 10 روز کی مہلت مانگی گئی جو زبانی طور پر دی گئ ۔

ان کا کہنا تھاکہ بھارت  کی جانب سے 18 ستمبر کو ای میل بھیجنے کا دعویٰ کیا گیا ہے جو درست نہیں، بھارتی ہاکی فیڈریشن ذمے داری کا مظاہرہ نہیں کر رہی لیکن ہم اسے سازش قرار نہیں دیں گے، ویزا درخواستوں کا 90 فیصد کام مکمل ہوچکا ہے، ہم نے صورتحال سے انٹر نیشنل اور ایشین ہاکی فیڈریشن کو آگاہ کر دیا ہے،امید ہے کہ ویزوں کے حوالے سے ہماری مکمل معاونت کی جائے گی اور کوئی مسئلہ نہیں ہوگا۔