03 اگست ، 2022 
پاکستان
ایمن الظواہری کو نشانہ بنانے والا ڈرون پاکستان سے نہیں اڑا : وزیرداخلہ
03 اگست ، 2022
وفاقی وزیرداخلہ رانا ثنااللہ نےکہا ہےکہ القاعدہ کے رہنما ایمن الظواہری کو نشانہ بنانے والا ڈرون پاکستان سے نہیں اڑا۔
اسلام آباد میں جیو نیوز سےگفتگو کرتے ہوئے رانا ثنااللہ کا کہنا تھا کہ آپ کے علم میں ہے کہ ایمن الظواہری کی ہلاکت کس طرح ہوئی اور وہ کہاں تھے، یہ ایسا معاملہ ہے جس پر افغانستان اور امریکا کے درمیان بات ہونی چاہیے۔
وزیر داخلہ کا کہنا تھا کہ یہ بھی دیکھا جانا چاہیےکہ مذاکرات میں اس حوالے سےکیا بات ہوئی تھی، اگر اس سے پہلے بات نہیں ہوئی تو اس مسئلےکو حل ہونا چاہیے۔
ان کا کہنا تھا کہ افغانستان میں امن ہو تو ہی پاکستان میں امن ہوتا ہے، افغانستان میں امن نہ ہو یا حالات ٹھیک نہ ہوں تو اثرات پاکستان پر بھی پڑتے ہیں۔
