اسلام آباد بارکا سپریم کورٹ ججز تقرریوں کا معاملہ دوبارہ جوڈیشل کمیشن بھجوانےکا مطالبہ

اسلام آباد بار کونسل نے سپریم کورٹ کے ججز کی تقرریوں کا معاملہ دوبارہ غور کے لیے جوڈیشل کمیشن بھجوانے کا مطالبہ کیا ہے۔

سپریم کورٹ میں ججز کی تقرریوں کے معاملے پر ردعمل میں اسلام آباد بار کونسل نےکہا ہے کہ سپریم کورٹ میں ججز تعیناتیاں سینیارٹی کے برعکس ہیں تاہم جسٹس اطہرمن اللہ کی سپریم کورٹ میں تعیناتی کا فیصلہ خوش آئند ہے۔

جوڈیشل کمیشن نے جسٹس اطہرمن اللہ سمیت 3 ججز کی سپریم کورٹ میں تعیناتی کی سفارش کردی

جسٹس اطہر من اللہ کے نام کی متفقہ، جسٹس شاہد وحید اور جسٹس حسن اظہر رضوی کی تعیناتی کی سفارش 4-5 کے تناسب سے ہوئی: ذرائع

اسلام آباد بار کونسل کا کہنا ہے کہ ہمارا مطالبہ تھا کہ سپریم کورٹ ججز تقرری کے عمل میں سینیارٹی کو نظر اندازنہ کیا جائے،  پیر کے جوڈیشل کمیشن اجلاس میں سینیارٹی نظر انداز کرکے جونیئر ججز تعینات کیےگئے، جسٹس اطہرمن اللہ کے سوا تمام غیر آئینی فیصلوں کے خلاف بھرپور احتجاج کرتے ہیں۔

اسلام آباد بار کونسل نے مطالبہ کیا ہےکہ ججز تقرریوں کا معاملہ دوبارہ غور کے لیے جوڈیشل کمیشن کو بھجوایا جائے اور تمام ہائی کورٹس سے سینیئر ترین جسٹس صاحبان کے نام ہی زیر غور لائے جائیں۔