27 جنوری ، 2023 
ن لیگ کا کراچی میں پارٹی کو منظم کرنے کا فیصلہ، اہم رہنماؤں کا رضا ہارون سے رابطہ
27 جنوری ، 2023
لاہور: مسلم لیگ ن کو کراچی میں منظم کرنے کے لیے پارٹی کے اہم رہنماؤں نے ایم کیو ایم کے سابق رہنما اور صوبائی وزیر رضا ہارون سے رابطہ کیا ہے۔
ن لیگ کے رہنماؤں نے ایم کیوایم کے سابق رہنما رضا ہارون سے لندن میں رابطہ کیا، سعد رفیق نے چند ماہ قبل رضا ہارون سے لندن میں ملاقاتیں کیں۔
اس حوالے سے رضا ہارون نے بھی تصدیق کرتے ہوئے کہا کہ سعد رفیق نے ملاقاتیں کیں اور ایاز صادق نے فون کر کے خوش آمدید بھی کہا، سعدرفیق کو کراچی کے سیاسی میدان میں اترنے کا پلان بھی بتایا۔
رضا ہارون کا کہنا ہے کراچی میں لیڈر شپ کا فقدان ہے، کراچی کو نواز شریف اور مریم نواز جیسے بڑے لیڈرز کی ضرورت ہے، نواز شریف اور مریم نواز کی آواز پر لوگ کھنچھے چلے آتے ہیں۔
سابق رہنما ایم کیو ایم نے کہا کہ نواز شریف جب چاہیں گے ان سے ملاقات کر لوں گا، نواز شریف کی آواز پر کراچی جانے کو تیار ہوں لیکن کراچی میں اترنے سے پہلے ہوم ورک کرنا ضروری ہے۔
مسلم لیگ ن کے مرکزی رہنما اور وزیر ریلوے خواجہ سعد رفیق کا کہنا ہے کہ رضا ہارون سے لندن میں دو یا تین ملاقاتیں ہوئیں، رضا ہارون ایک بڑا اور اچھا نام ہے جن پر کوئی الزام نہیں، لندن میں ملاقاتیں ہوئی ہیں، ابھی مزید بات ہو گی، رضا ہارون کو ملنے سے پہلے اپنے اتحادی خالد مقبول صدیقی سے بھی بات کی تھی۔
