وہ عام علامات جو انزائٹی کا نتیجہ ہوتی ہیں

09 فروری ، 2023

انزائٹی امراض اب بہت زیادہ عام ہوتے جا رہے ہیں / فائل فوٹو

انزائٹی ایک ایسی طبی اصطلاح ہے جو اس وقت استعمال کی جاتی ہے جب کوئی فرد مختلف چیزوں کی وجہ سے گھبراہٹ، تناؤ یا اضطراب کا شکار ہو جاتا ہے۔

دنیا میں ہر فرد کو ہی زندگی میں کبھی نا کبھی انزائٹی کا تجربہ ہوتا ہے مگر کچھ افراد کو اس کا بہت زیادہ سامنا ہوتا ہے یعنی وہ ہر وقت پریشان، فکرمند یا گھبراہٹ کے شکار رہتے ہیں یا اپنی زندگی میں انہیں مثبت جذبات محسوس نہیں ہوتے۔

درحقیقت موجودہ عہد میں انزائٹی امراض بہت زیادہ عام ہوتے جا رہے ہیں۔

ایسے افراد کو ایک عارضے جنرلائزڈ انزائٹی ڈس آرڈر (جی اے ڈی) کا سامنا ہوتا ہے جس کے باعث وہ زندگی کے ہر معاملے پر بہت زیادہ فکرمند رہنے لگتے ہیں۔

اس عارضے کے شکار افراد کے لیے پریشانی سے بچنا بہت مشکل ہوتا ہے اور کسی بھی وجہ سے وہ گھبراہٹ کے شکار ہو جاتے ہیں۔

جیسا اوپر درج کیا جاچکا ہے کہ انزائٹی کے مسئلے کا سامنا ہر فرد کو ہوسکتا ہے اور اسی وجہ سے اس عارضے کی علامات کو جاننا فائدہ مند ثابت ہوسکتا ہے کیونکہ اس سے علاج میں مدد ملتی ہے۔

انزائٹی کی چند عام علامات درج ذیل ہیں۔

خوف کا احساس

انزائٹی کی سب سے عام علامت ایسی چیزوں سے خوف محسوس ہونا ہے جو عام زندگی میں مضحکہ خیز محسوس ہوتی ہیں۔

تحقیقی رپورٹس کے مطابق انزائٹی ڈس آرڈر سے دماغ میں خوف سے متعلق ردعمل بہت آسانی سے متحرک ہونے لگتا ہے جبکہ اس کی شدت بہت زیادہ ہوتی ہے۔

توجہ مرکوز کرنے میں مشکل محسوس ہونا

انزائٹی کی ایک اور عام علامت توجہ مرکوز کرنے میں مشکل محسوس ہونا ہے۔

ایسے افراد جس چیز سے خوفزدہ ہوتے ہیں، اس پر اتنی زیادہ توجہ مرکوز کرتے ہیں کہ ان کے لیے اپنے کام یا دیگر افراد پر توجہ مرکوز کرنا ممکن ہی نہیں رہتا۔

ایسے مریضوں کو ذہن خالی ہونے کا احساس بھی ہوتا ہے اور کچھ بھی سوچنا ناممکن لگتا ہے۔

گھبراہٹ یا ہیجانی کیفیت

انزائٹی کے مریض اگر فکر مند ہوں تو انہیں گھبراہٹ بھی محسوس ہوتی ہے اور کپکپی طاری ہو جاتی ہے۔

اس کی وجہ یہ ہوتی ہے کہ انزائٹی کے نتیجے میں مسلز میں کھچاؤ بڑھتا ہے اور جسم میں ایک ہارمون adrenaline خارج ہوتا ہے جس کے باعث گھبراہٹ یا ہیجان محسوس ہوتا ہے اور مسلز پھڑکنے لگتے ہیں۔