صحت و سائنس

وہ غذا جس کے زیادہ استعمال سے ڈپریشن کا خطرہ بڑھتا ہے

02 مارچ ، 2023

یہ بات ایک طبی تحقیق میں سامنے آئی / رائٹرز فوٹو

جنک فوڈ کا استعمال آپ کے جسمانی وزن میں اضافے کا باعث ہی نہیں بنتا بلکہ ڈپریشن کا شکار بھی کر سکتا ہے۔

یہ بات برازیل میں ہونے والی ایک طبی تحقیق میں سامنے آئی۔

جرنل آف Affective Disorders میں شائع تحقیق میں بتایا گیا کہ الٹرا پراسیس غذاؤں کا زیادہ استعمال کرنے والے افراد میں ڈپریشن کا خطرہ دیگر کے مقابلے میں 80 فیصد زیادہ ہوتا ہے۔

الٹرا پراسیس غذاؤں میں ڈبل روٹی، فاسٹ فوڈز، مٹھائیاں، ٹافیاں، کیک، چپس، بریک فاسٹ سیریلز، چکن اور فش نگٹس، انسٹنٹ نوڈلز، میٹھے مشروبات اور سوڈا وغیرہ شامل ہیں۔

اس تحقیق میں 2572 افراد کو شامل کرکے ان کی غذائی اور طرز زندگی کی عادات کی تفصیلات جمع کی گئی تھیں۔

نتائج سے معلوم ہوا کہ الٹرا پراسیس غذاؤں کا زیادہ استعمال کرنے والے افراد میں ڈپریشن کی تشخیص کا خطرہ زیادہ ہوتا ہے۔

محققین نے اعتراف کیا کہ تحقیق کے نتائج لوگوں کی جانب سے جمع کرائی گئی تفصیلات پر مبنی ہیں اور کلینیکل ٹرائل نہیں ہوا، تو اس حوالے سے مزید تحقیق کی ضرورت ہے۔

اس سے قبل جولائی 2022 میں یورپین جرنل آف نیوٹریشن میں شائع ایک تحقیق میں بتایا گیا تھا کہ الٹرا پراسیس غذاؤں کا استعمال دماغی صحت کے لیے نقصان دہ ہوتا ہے بالخصوص درمیانی عمر کے افراد کے لیے۔

اس تحقیق میں 2700 سے زیادہ افراد کو شامل کرکے ان کی غذائی عادات کا جائزہ لیا گیا تھا۔

تحقیق میں بتایا گیا کہ مچھلی، زیتون کے تیل، پھلوں، سبزیوں اور گریوں پر مشتمل غذا کو معمول بنانے سے عمر کے ساتھ آنے والی دماغی تنزلی اور ڈیمینشیا جیسے امراض کا خطرہ کم کیا جاسکتا ہے۔