کیا دی سمپسنز نے ’تھریڈز‘ کی بھی پیشگوئی کی تھی؟

09 جولائی ، 2023

سوشل میڈیا کی متعدد پوسٹس میں دعویٰ کیا جا رہا ہے کہ ’تھریڈز‘ ایپ کی سمپسنز کارٹون میں پہلے ہی پیشگوئی کی جاچکی ہے__فوٹو: غیر ملکی میڈیا

دنیا بھر میں مقبول اور سب سے زیادہ پسندیدہ اینی میٹڈ شو دی سمپسنز میں متعدد اہم حالات و واقعات کی پیش گوئیاں کی گئی ہیں۔

اس اینی میٹڈ ٹی وی شو میں ٹرمپ کے برسر اقتدار آنے اور نائن الیون سمیت دنیا میں رونما ہونے والے متعدد اہم واقعات کی پیش گوئی کی گئی ہے، یہ کارٹون سیریز 1989 میں شروع کی گئی تھی جو کہ تقریباً 30 برسوں سے جاری ہے اور اس کے 34 سیزن نشر ہوچکے ہیں۔

حال ہی میں میٹا کے مالک مارک زکر برگ کی جانب سے نئی ایپلیکیشن ’تھریڈز‘ لانچ کی گئی جس نے آتے ہی ٹوئٹر کے لیے خطرے کی گھنٹی بجادی اور پھر اس کے متعارف ہوتے ہی اسے جو پذیرائی ملی اس کی مثال نہیں ملتی۔

تاہم اب سوشل میڈیا کی متعدد پوسٹس میں دعویٰ کیا جا رہا ہے کہ ’تھریڈز‘ ایپ کی سمپسنز کارٹون میں پہلے ہی پیشگوئی کی جاچکی ہے۔

دی سمپسنز اور میٹا کی نئی ایپ سے متعلق ٹوئٹر پر متعدد پوسٹس زیر گردش ہیں جن میں دعویٰ کیا جا رہا ہے کہ معروف امریکی کارٹون سیریز، سمپسنز میں ’تھریڈز‘ کی بھی پیش گوئی کی گئی تھی۔

اس دعوے سے متعلق سمپسنز کارٹون کی حالیہ قسط میں اس کارٹون کے مرکزی کردار ’ہومر‘ کی ایک تصویر سوشل میڈیا پر وائرل ہے جس میں اس کے کان پر میٹا کی نئی ایپ ’تھریڈز‘ کا لوگو بنا ہوا ہے۔

ہومر کی اس تصویر سے متعلق دعویٰ کیا جا رہا ہے کہ سمپسنز سیریز میں تھریڈز کے حوالے سے بھی دکھایا جا چکا ہے لیکن درحقیقت ایسا کچھ نہیں ہے، یہ تصویر ترمیم شدہ ہے جسے سوشل میڈیا پر وائرل کیا گیا۔

میڈیا رپورٹس کے مطابق کارٹون ہومر کے کان پر بنایا گیا ’تھریڈز‘ ایپ کا لوگو پہلے سے کی گئی کوئی پیش گوئی نہیں بلکہ حال ہی میں تھریڈز کے لانچ ہونے کے بعد ایڈٹ کیا گیا ہے۔

اس حوالے سے کچھ صارفین نے ہومر کے کان کی اصل تصویر بھی شیئر کی جو ایڈٹ کرنے سے قبل تھی۔