اب آپ گوگل بارڈ پر اردو زبان میں بھی سوالات کر سکتے ہیں

13 جولائی ، 2023

گوگل بارڈ میں کئی نئے فیچرز کا اضافہ کیا گیا ہے / فائل فوٹو

اگر آپ گوگل کے آرٹی فیشل انٹیلی جنس (اے آئی) چیٹ بوٹ بارڈ کو استعمال کرتے ہیں تو اچھی خبر یہ ہے کہ اب اس پر انگلش میں سوالات کرنے کی ضرورت نہیں بلکہ اردو میں بھی ایسا ممکن ہے۔

گوگل نے اپنے اے آئی چیٹ بوٹ میں کئی نئے فیچرز کا اضافہ کیا ہے تاکہ مائیکرو سافٹ اور دیگر اے آئی کمپنیوں سے مقابلے میں اسے مدد مل سکے۔

گوگل کی جانب سے مارچ میں بارڈ کو دنیا کے مختلف ممالک میں متعارف کرایا گیا تھا اور اب اس کا استعمال مزید بہتر بنایا گیا ہے۔

کمپنی کی جانب سے گوگل بارڈ میں اردو سمیت 40 سے زائد زبانوں کی سپورٹ فراہم کی گئی ہے، جس کے بعد اردو زبان میں بھی سوالات پوچھے جا سکتے ہیں۔

یہ بھی پڑھیں

اس کے ساتھ ساتھ گوگل بارڈ میں اب تصاویر کے ذریعے بھی معلومات کی جا سکتی ہیں۔

اسے گوگل لینس فیچر کا نام دیا گیا ہے اور اس کے ذریعے صارفین کسی تصویر کو اپ لوڈ کرکے اس کے بارے میں تفصیلات یا کیپشن کے بارے میں مشورہ حاصل کر سکیں گے۔

فی الحال یہ فیچر انگلش زبان میں ہی کام کر سکے گا۔

گوگل کے مطابق بارڈ استعمال کرنے والے اے آئی چیٹ بوٹ کے جواب 5 مختلف اسٹائل میں حاصل کر سکتے ہیں، یہ فیچر بھی فی الحال انگلش زبان تک محدود ہے۔

گوگل بارڈ میں آڈیو ریسپانس فیچر کا بھی اضافہ کیا گیا ہے جس سے صارفین کو کسی لفظ کا درست تلفظ سننے میں مدد ملے گی یا وہ کسی نظم یا اسکرپٹ کو سن سکیں گے۔

یہ فیچر 40 سے زائد زبانوں میں کام کرے گا۔