28 اگست ، 2023 
ناظم آباد میں انڈر پاس کا سائن بورڈ گرنے سے ایک شخص جاں بحق، 2 زخمی
28 اگست ، 2023
کراچی کے علاقے ناظم آباد میں انڈر پاس کا سائن بورڈ گرگیا جس کے باعث موٹر سائیکل سوار ایک شخص جاں بحق اور 2 زخمی ہوگئے، زخمیوں کو فوری طور پر عباسی شہید اسپتال منتقل کیا گیا۔
پولیس حکام کے مطابق سائٹ ایریا سے ناظم آباد جانے والے انڈپاس کے ٹریک پر سائن بورڈ گرگیا۔ واقعے کے وقت انڈر پاس میں ٹریفک رواں دواں تھا جس کے باعث سائن بورڈ سر پر لگنے سے 3 موٹر سائیکل سوار زخمی ہوگئے۔
تینوں افراد شاہد ، کاشف اور عامر کو قریبی واقع عباسی شہید اسپتال لے جایا گیا جہاں سے ایک زخمی عامر کی حالت نازک ہونے پر اسے جناح اسپتال منتقل کیا گیا تاہم وہ جانبر نہ ہوسکا۔
واقعے کے بعد جائے حادثہ پر شہریوں کا رش لگ گیا اور جس جگہ سائن بورڈ نصب تھا وہاں کا پلاسٹر اکھڑا ہوا نظر آیا جس سے یوں معلوم ہوتا ہے کہ مذکورہ جگہ کافی عرصے سے مخدوش تھی اور بروقت مرمت نہ ہونے کی وجہ سے حادثہ پیش آیا۔
