سندھ میں خواتین کو بااختیار بنانے کیلئے ڈی آئی جی ڈرائیونگ لائسنس برانچز کا احسن اقدام

کراچی: سندھ میں خواتین کو بااختیار بنانے کیلئے ڈی آئی جی ڈرائیونگ لائسنس برانچز عرفان علی بلوچ کا ’وومن آن ویلز‘ کے سلوگن کے ساتھ احسن اقدام دیکھنے میں آیا ہے جسے وومن امپاورمنٹ کے حوالے سے کافی پذیرائی مل رہی ہے۔

جیو نیوز کو انٹر ویو دیتے ہوئے  ڈی آئی جی عرفان علی بلوچ نے بتایا کہ وومن امپاورمنٹ پر پورے ملک خاص طور پر سندھ میں کافی کام ہو رہا ہے لیکن انہوں نے اس سلسلے میں ’وومنز آن ویلز‘ کا سلوگن متعارف کرایا ہے جسے وہ وومن امپاورمنٹ کا دروازہ قرار دیتے ہیں۔

انہوں نے کہا کہ ایک خاتون کو ماں، بہن، بیٹی یا بیوی کی حیثیت سے گھر سے باہر نکلنے کیلئے بیٹے، بھائی، باپ یا شوہر کا انتظار کرنا پڑتا ہے یا ان کیلئے ڈرائیورز رکھنے پڑتے ہیں، ایسی لڑکی یا خاتون اگر خود گاڑی چلانا سیکھے گی اور لائسنس حاصل کر لے گی تو اس کے اندر خود مختاری آئے گی اور وہ خود کو کسی کی محتاج نہیں سمجھے گی، وہ خود بچوں کو اسکول چھوڑ سکے گی، کالج، یونیورسٹی، دفتر یا شاپنگ سینٹر جا سکے گی اور گھر کے چھوٹے موٹے کام وقت پر سرانجام دے سکے گی۔ 

ڈی آئی جی عرفان بلوچ کا کہنا تھا کہ وہ اس سے بھی بہت آگے کا سوچ رہے ہیں، وہ چاہتے ہیں کہ خواتین نہ صرف اپنی ضرورت کیلئے گاڑی چلا سکیں بلکہ وہ کمرشل بنیادوں پر ڈرائیونگ کو ذریعہ معاش بھی بناسکتی ہیں، خواتین ڈرائیونگ لائسنس حاصل کرکے آن لائن ٹیکسی سروس جوائن کرسکتی ہیں جس کے تحت وہ اپنے اور اپنے خاندان کی خود کفالت کرسکتی ہیں۔

انہوں نے مزید کہا کہ اگر شہر میں لڑکیاں یا خواتین آن لائن ٹیکسی کے مرد ڈرائیورز کے ساتھ سفر کرسکتی ہیں تو اگر کوئی خاتون  آن لائن ٹیکسی ڈرائیور بن جائے گی تو ساتھ سفر کرنے والی خاتون خود کو زیادہ محفوظ کریں گی۔

عرفان بلوچ نے بتایا کہ اس سلوگن کے تحت یونیورسٹیز، کالجز اور دیگر مختلف اداروں میں خواتین کیلئے ڈرائیونگ لائسنس برانچز کے کیمپ کا انعقاد کر چکے ہیں اور مختلف تعلیمی اداروں میں اس سلسلے میں سیمینار بھی منعقد کروا رہے ہیں۔

انہوں نے کہا کہ کراچی کی ڈرائیونگ لائسنس برانچز میں انہوں نے خواتین کیلئے الگ کاؤنٹرز قائم کردیے ہیں جہاں خواتین ہی انہیں ڈیل کرکے ڈرائیونگ لائسنس فراہم کرتی ہیں۔