14 دسمبر ، 2023 
الیکشن کمیشن انتخابی شیڈول کب جاری کرے گا؟
14 دسمبر ، 2023
اسلام آباد:الیکشن کمیشن آف پاکستان (ای سی پی) عام انتخابات کے شیڈول کا اعلان 17 دسمبر (اتوار) کو اسلام آباد میں کرے گا اور انتخابات اگلے سال 8 فروری کو ہوں گے۔
انتخابات کے شیڈول کے اعلان کے اگلے دن کاغذات نامزدگی کی وصولی شروع کر دی جائے گی۔
ای سی پی کے اعلیٰ ذرائع نے دی نیوز کو بتایا کہ الیکشن کمیشن نے اس پورے عمل کے لیے 54 دن دینے کا فیصلہ کیا ہے جو 8 فروری کو قومی اور صوبائی اسمبلیوں کے لیے پولنگ کے ساتھ اختتام پذیر ہوگا۔
الیکشن شیڈول کے اعلان کے ساتھ ہی وفاقی اور صوبائی حکومتوں کی پوری انتظامیہ انتخابات کے انعقاد کے لیے کمیشن کی معاونت کی پابند ہو گی۔
یاد رہے کہ چند روز قبل سوشل میڈیا پر ایک انتخابی شیڈول زیر گردش تھا جس کی ترجمان الیکشن کمیشن نے واضح الفاظ میں تردید کرتے ہوئے کہا تھا کہ الیکشن شیڈول کا اعلان صرف ترجمان الیکشن کمیشن کریں گے لہٰذا کسی اور شیڈول پر کان نہ دھرے جائیں۔
