گوگل کے اے آئی چیٹ بوٹ بارڈ میں تحریر کو تصویر میں بدلنے کا فیچر متعارف

اگر آپ کو کسی موضوع کے بارے میں تصویر چاہیے تو سرچ کرکے ڈھونڈنے کی بجائے اسے گوگل بارڈ پر جاکر بھی تیار کر سکتے ہیں۔

جی ہاں واقعی آپ گوگل کے آرٹی فیشل انٹیلی جنس (اے آئی) ٹیکنالوجی سے لیس چیٹ بوٹ کو تصاویر بنانے کے لیے استعمال کر سکتے ہیں۔

کمپنی کی جانب سے بارڈ میں ٹیکسٹ ٹو امیج فیچر متعارف کرانے کا اعلان کیا گیا ہے جو تمام صارفین کو دستیاب ہے۔

یہ فیچر گوگل کے نئے diffusion ماڈل امیجن 2 پر کام کرتا ہے اور اس سے تیار ہونے والی تصاویر پر ڈیجیٹل واٹر مارک ہوگا۔

اس اپ ڈیٹ کے بعد گوگل بارڈ بھی چیٹ جی پی ٹی اور مائیکرو سافٹ کو پائلٹ کی طرح اے آئی تصاویر بنانے والے چیٹ بوٹس میں شامل ہوگیا ہے۔

کمپنی کے مطابق اے آئی تصاویر اور انسانوں کے تیار کردہ آرٹ ورک کے درمیان واضح فرق رکھا جائے گا۔

گوگل کی جانب سے لوگوں کے نام لکھ کر تصاویر بنانے کی اجازت بھی نہیں دی جائے گی۔

اس پابندی کا مقصد ڈیپ فیک تصاویر کی تیاری کو روکنا ہے۔

یہ فیچر ابھی صرف انگلش ہدایات پر ہی کام کرے گا۔

گوگل کے مطابق ٹیکسٹ ٹو امیج فیچر کے ساتھ ساتھ گوگل بارڈ میں اے آئی ماڈل ماڈل جیمنائی پرو کی سپورٹ بھی مختلف زبانوں میں فراہم کی جا رہی ہے۔