14 نومبر ، 2024 
بابر اعظم نے ٹی ٹوئنٹی انٹرنیشنلز میں مزید 2 ریکارڈز اپنے نام کرلیے
14 نومبر ، 2024
پاکستان کو آسٹریلیا کے خلاف پہلے ٹی ٹوئنٹی میں تو شکست ہوئی لیکن اس میچ میں قومی کرکٹر بابر اعظم نے پاکستان کیلئے مزید 2 ریکارڈز اپنے نام کرلیے۔
پاکستان اور آسٹریلیا کے درمیان 3 ٹی ٹوئنٹی میچز کی سیریز کا پہلا میچ آج برسبین میں کھیلا گیا ۔ بارش سے متاثرہ میچ میں آسٹریلیا نے پاکستان کو 29 رنز سے شکست دی۔
بارش کے باعث دونوں ٹیموں کے درمیان فی اننگز 7 اوورزکا کھیل ہوا، پاکستان نے ٹاس جیت کر بولنگ کا فیصلہ کیا تھا۔
آسٹریلیا کی جانب سے دیے گئے 94 رنز کے ہدف کے تعاقب میں پاکستانی ٹیم مقررہ 7 اوورز میں 9 وکٹوں کے نقصان پر 64 رنز ہی بنا سکی۔
اس میچ میں بابر اعظم نے 2 اہم ریکارڈ اپنے نام کرلیے۔
آسٹریلیا کے خلاف ٹی ٹوئنٹی بابر اعظم کا اس فارمیٹ کا 124 واں انٹرنیشنل میچ تھا جس کے بعد وہ پاکستان کی جانب سے سب سے زیادہ ٹی ٹوئنٹی انٹرنیشنل میچز کھیلنے والے کھلاڑی بن گئے۔
اس سے قبل یہ اعزاز سابق کپتان شعیب ملک کے پاس تھا جنہوں نے 123 ٹی ٹوئنٹی انٹرنیشنلز میں پاکستانی کی نمائندگی کی۔
اس کے علاوہ بابر اعظم ٹی ٹوئنٹی انٹرنیشنلز میں سب سے زیادہ کیچز لینے والے پاکستانی کرکٹر بھی بن گئے۔
آسٹریلیا کے خلاف میچ میں بابر نے 2 کیچ لیے، جس کے بعد ان کے اس فارمیٹ میں کیچز کی تعداد 52 ہوگئی ہے۔
اس سے قبل ٹی ٹوئنٹی انٹرنیشنلز میں سب زیادہ کیچز لینے والے پاکستانی کرکٹر کا اعزاز فخر زمان اور شعیب ملک کے پاس تھا جنہوں نے 50، 50 کیچ لیے۔
واضح رہے کہ بابر اعظم ٹی ٹوئنٹی انٹرنیشنلز میں سب سے زیادہ رنز بنانے والے پاکستانی بیٹر بھی ہیں۔
مزید خبریں :
سابق بھارتی کرکٹر کی طبیعت ناساز، اسپتال میں داخل
5 گھنٹے پہلے
’چیتا‘ قرار دیدیا، بابراعظم بھی اوپنر صائم ایوب کے مداح ہوگئے
23 دسمبر ، 2024
پاکستان اور جنوبی افریقا کا آخری ون ڈے بارش کی نذر ہونیکا امکان
22 دسمبر ، 2024
پاکستان کے ٹی 20 اسکواڈ کو بہتر بنانے کیلئے بڑا فیصلہ کرلیا گیا
22 دسمبر ، 2024
