صحت و سائنس

جوان افراد میں تیزی سے پھیلنے والی کینسر کی قسم سے بچنے کا آسان طریقہ سامنے آگیا

14 فروری ، 2025

جوان افراد میں تیزی سے پھیلنے والی کینسر کی قسم سے بچنے کا آسان طریقہ سامنے آگیا — یہ انکشاف ایک تحقیق میں سامنے آیا / فائل فوٹو

دنیا بھر میں جوان افراد میں آنتوں کے کینسر کے کیسز کی شرح میں اضافہ ہو رہا ہے۔

خیال رہے کہ کینسر کو دنیا میں اموات کی وجہ بننے والا دوسرا بڑا مرض خیال کیا جاتا ہے اور اس کی چند اقسام سب سے زیادہ ہلاکتوں کا باعث بنتی ہے، جن میں سے ایک آنتوں کا کینسر بھی ہے۔

کچھ عرصے قبل جرنل Lancet Oncology میں شائع تحقیق میں دریافت کیا گیا کہ یورپ، شمالی افریقا، ایشیا اور اوشیانا سمیت دنیا بھر میں جوان افراد میں آنتوں کے کینسر عام ہو رہا ہے۔

محققین ابھی یہ مکمل طور پر نہیں سمجھ سکے کہ آنتوں کا کینسر دنیا بھر میں تیزی سے کیوں پھیل رہا ہے۔

مگر ان کا ماننا ہے کہ جنک فوڈ کا استعمال، زیادہ وقت بیٹھ کر گزارنے اور موٹاپا ممکنہ طور پر کینسر کے پھیلاؤ میں اہم کردار ادا کرنے والے عناصر ہیں۔

اب ایک نئی تحقیق میں دنیا بھر میں تیزی سے عام ہونے والے اس کینسر سے تحفظ کا آسان اور مزیدار طریقہ بتایا گیا ہے۔

اگر آپ اکثر دہی کھانا پسند کرتے ہیں تو یہ عادت آنتوں کے کینسر سے تحفظ فراہم کرسکتی ہے۔

یہ بات امریکا میں ہونے والی ایک طبی تحقیق میں سامنے آئی۔

ماس جنرل بریگھم کی اس تحقیق میں بتایا گیا کہ دہی کھانے کی عادت سے طویل المعیاد بنیادوں پر آنتوں کے کینسر سے بچنے میں مدد مل سکتی ہے۔

اس تحقیق کے لیے 2 تحقیقی رپورٹس کے ڈیٹا کی جانچ پڑتال کی گئی جن میں ڈیڑھ لاکھ کے قریب افراد کو شامل کیا گیا تھا اور ان کی صحت کا جائزہ 12 برسوں تک لیا گیا تھا۔

ان افراد سے طرز زندگی کے عناصر، امراض اور غذائی عادات کے بارے میں تفصیلات سوالناموں کے ذریعے حاصل کی گئی تھیں۔

ان تفصیلات میں یہ بھی معلوم کیا گیا تھا کہ وہ روزانہ کی بنیاد پر کتنی مقدار میں دہی کھانے کے عادی ہیں جبکہ ان افراد میں سے جن میں آنتوں کے کینسر کی تصدیق ہوئی تھی، ان کے نمونوں کا تجزیہ بھی کیا گیا۔

تحقیق میں دریافت کیا گیا کہ 3079 افراد میں آنتوں کے کیسنر کی تشخیص ہوئی تھی اور اس حوالے سے معدے میں موجود بیکٹیریا کی مخصوص اقسام کا کردار اہم تھا۔

تحقیق کے مطابق طویل المعیاد بنیادوں پر دہی کے استعمال سے آنتوں کے کینسر کا خطرہ 20 فیصد تک گھٹ جاتا ہے۔

درحقیقت محققین نے دریافت کیا کہ ہر ہفتے 2 یا اس سے زائد بار دہی کھانے سے کینسر کی اس قسم سے بچنے میں مدد ملتی ہے۔

محققین نے بتایا کہ یہ کافی عرصے سے مانا جاتا ہے کہ دہی کا استعمال معدے کی صحت کے لیے مفید ہوتا ہے اور ہماری تحقیق سے عندیہ ملتا ہے کہ اس سے آنتوں کے کینسر کی مخصوص اقسام سے تحفظ ملتا ہے۔