لاہور … لاہورمیں ایجرٹن روڈ پر ایل ڈی اے پلازہ میں دوپہر 12 بجے کے قریب لگنے والی آگ پر اب تک قابو نہ پایا جا سکا، آتشزدگی کے دوران 5 افراد ساتویں منزل سے کود گئے، جو اسپتال پہنچ کر دم توڑ گئے، ڈی جی ریسکیو1122 کے مطابق شبہ ہے کہ 10 سے 12 افراداب بھی عمارت میں پھنسے ہوئے ہیں۔ ریسکیو حکام کے مطابق ایجرٹن روڈ پر واقع ایل ڈی اے پلازہ کی ساتویں منزل پر دوپہر 12 بجے کے قریب آگ بھڑک اٹھی، جس نے دیکھتے ہی دیکھتے اوپر کی 2منزلوں کو بھی لپیٹ میں لے لیا، آتشزدگی کی وجہ سے درجنوں افراد عمارت میں پھنس گئے، انہوں نے کھڑکیوں کے شیشے توڑ دیئے اور کھڑکیوں اور چھت پر کھڑے ہو کر مدد کیلئے پکارتے رہے، دھواں بھر جانے اور آگ کے شعلوں کی وجہ سے ان کی حالت غیر ہو گئی، کئی گھنٹے تک چیخ و پکار اور بے بسی کے بعد بھی کوئی مدد کو نہ آیا تو آگ میں پھنسے افرادیکے بعد دیگرے کھڑکیوں سے چھلانگ لگانے پر مجبور ہوگئے، ساتویں منزل کی کھڑکیوں میں کھڑے متعدد افرادکو چھت پر موجود لوگوں نے رسیوں کی مدد سے اوپر کھینچا، اس دوران ایل ڈی اے پلازہ کا ملازم اقبال رسی چھوٹ جانے کے باعث نیچے آگرا، اسے شدید زخمی حالت میں گنگا رام اسپتال منتقل کیا گیا، لیکن وہ جاں بر نہ ہو سکا۔ ریسکیو اور فائر بریگیڈ کی درجن بھر گاڑیاں آگ بجھانے کی کوششوں میں مصروف ہیں، لیکن آگ پر اب بھی قابو نہیں پایا جاسکا ہے۔