لندن…متحدہ قومی موومنٹ قائد الطاف حسین نے کہاہے کہ چیف آف آرمی اسٹاف جنرل اشفاق پرویز کیانی نے اپنے عہدے کی آئینی مدت پوری ہوجانے پر رضاکارانہ ریٹائرمنٹ کا اعلان کرکے مسلح افواج کی جانب سے ایک مثبت اورٹھوس روایت قائم کی ہے ۔ایک بیان میں الطاف حسین نے کہاکہ جنرل اشفاق پرویز کیانی کی قیادت میں ملک متعدد بار ایسے نازک ادوار کا شکار ہوا جبکہ وہ کوئی بھی بہانہ یا وجہ بناکر جمہوریت کی بساط لپیٹ سکتے تھے لیکن انہوں نے ایسا نہ کرکے جمہوریت کو مزید مستحکم کیا اور پروان چڑھایا۔الطاف حسین نے کہاکہ جنرل اشفاق پرویز کیانی نے اپنی مدت ملازمت کے دوران انتہائی کٹھن اورسنگین حالات کا سامنا کیااوران کی قیادت میں مسلح افواج نے ڈٹ کرمشرقی اور مغربی محاذوں پر ملک کا دفاع کیا۔ الطاف حسین نے کہاکہ میں ان خدمات پرجنرل اشفاق پرویز کیانی اوران کے تمام ساتھیوں کو زبردست خراج تحسین پیش کرتا ہوں اوران کی صحت یابی ، تندرستی ، پاکستان کی بقاء اور سلامتی کیلئے دل کی گہرائیوں سے دعا گوہوں۔اللہ پاکستان کا حامی وناصر ہو۔