لندن … متحدہ قومی موومنٹ کے قائد الطاف حسین نے سابق صدرجنرل ریٹائرڈ پرویزمشرف کوفون کرکے انہیں آئین شکنی کے مقدمہ میں خصوصی عدالت کی جانب سے دیے گئے فیصلے پر مبارکبادپیش کی ۔الطاف حسین نے سابق صدرسے گفتگوکرتے ہوئے کہا کہ خصوصی عدالت کایہ فیصلہ اس اصولی مؤقف کی کامیابی ہے کہ اس قسم کے مقدمے میں کسی ایک فرد کے خلاف کارروائی انصاف کے اصولوںکے منافی ہے۔انھوں نے اس فیصلے پر جنر ل پرویزمشرف ، ان کے اہل خانہ اوردیگر تمام احباب کوبھی مبارکباد پیش کی ۔ جنرل ریٹائرڈ پرویزمشرف نے اس معاملے میں بھرپور اخلاقی حمایت کرنے پر الطاف حسین اوران کے احباب کا شکریہ اداکیا۔ دریں اثناء الطاف حسین نے سابق صدرکی پیروی کرنے والے ممتاز قانون داں بیرسٹر فروغ نسیم کوفون پر مبارکبادپیش کی ،اور کہاکہ آپ نے جس طرح بھرپوردلائل کے ساتھ اس مقدمہ کی پیروی کی ہے اوراہم قانونی نکات کواٹھاکر قوم کی رہنمائی کی ہے اس پر آپ زبردست مبارکباد کے مستحق ہیں۔ بیرسٹرفروغ نسیم نے بھی الطاف حسین کواس فیصلے پرمبارکبادپیش کی ۔ مزیدبرآں الطاف حسین نے آل پاکستان مسلم لیگ کے مرکزی رہنما اورممتازقانون داںبیرسٹراحمدرضاقصوری کوبھی فون کرکے انہیں خصوصی عدالت کے فیصلے پر مبارکبادپیش کی ۔ اورکہاکہ اس مقدمہ میں آپ اور جن دیگر تمام آئینی وقانونی ماہرین اورسینئر وجونیئر وکلاء نے ابتداء سے لیکر اب تک اپنی خدمات پیش کی ہیں وہ تمام ہی خراج تحسین اورمبارکبادکے مستحق ہیں۔احمدرضاقصوری نے بھی الطاف حسین کواس فیصلے پرمبارکباد پیش کی ۔