کراچی......متحدہ قومی موومنٹ کی رابطہ کمیٹی کے ڈپٹی کنوینر ڈاکٹر خالد مقبول صدیقی نے ’’ایم کیوایم ۔ مضبوط پاکستان کی ضمانت ‘‘کے عنوان سے جاری رکنیت سازی مہم کے سلسلے میں ایم کیوایم لیبر ڈویژن کے تحت بلدیات ایجوکیشن میں مولوی عبد الحق اسکول واٹر پمپ میں لگائے گئے رکنیت سازی کیمپ کا دورہ کرکے رکنیت سازی کیلئے بڑی تعداد میں آنے والی خواتین ، نوجوانوں اور بزرگوں اور مختلف شعبہ ہائے زندگی سے تعلق رکھنے والے افراد کا خیر مقدم کیا ۔اس موقع پر ایم کیوایم لیبر ڈویژن کے انچارج کاظم رضا ، جوائنٹ انچارجز زوار حسین اور صابر خان بھی موجود تھے ۔ ڈاکٹر خالد مقبول صدیقی نے رکنیت سازی کیمپ پر اب تک ایم کیوایم میں شمولیت اختیار کرنے والے افراد کی تفصیلات معلوم کیں اور لوگوں کی بڑی تعداد کی روزانہ کی بنیاد پر ایم کیوایم میں شمولیت کو خوش آئندہ قرار دیا ۔ اس موقع پر گفتگو کرتے ہوئے ڈاکٹر خالد مقبول صدیقی نے کہاکہ ایم کیوایم کی رکنیت سازی مہم کو ملک بھر میں جس طرح سے مظلوم قومیتوں کی جانب سے پذیرائی مل رہی ہے وہ اس بات کی غماز ہے کہ غریب و متوسط طبقے کا انقلاب اگر ملک میں آئے گا تو وہ صرف اور صرف قائد تحریک الطاف حسین کی قیادت میں ہی آئے گا ۔ انہوں نے کہاکہ ایم کیوایم رکنیت سازی مہم اس بات کی پیشنگوئی کررہی ہے کہ ایم کیوایم آئندہ انتخابات میں ملک بھر سے غریب و متوسط طبقے کی قیادت کو متعارف کرائے گی اور غریب و متوسط طبقے کی یہ قیادت منتخب ایوانوں میں جاگیرداروں ، وڈیروں اور سرداروں کی نام نہاد مفاد پرستانہ سیاست کو جڑ سے ختم کرکے ملک و قوم کو ترقی و خوشحالی کی اس راہ پر گامزن کرے گی جس کا خواب قائد اعظم محمد علی جناح نے دیکھا تھا ۔ ڈاکٹر خالد مقبول صدیقی نے رکنیت سازی کیمپوں پر خدمات انجام دینے والے ایم کیوایم لیبر ڈویژن کے ذمہ داران و کارکنان کو خراج تحسین پیش کیا اور رکنیت سازی مہم کی کامیابی پر عوام کو دلی مبارکباد بھی پیش کی ۔