کابل.......آئی این پی.......افغانستان کے دارالحکومت کابل میں 2خودکش دھماکوں میں 20سیکورٹی اہلکاروں سمیت 35افراد ہلاک اور200 سے زائد زخمی ہوگئے ہیں۔ افغان صدر اشرف غنی نے خودکش دھماکوں کی شدید مذمت کرتے ہوئے کہا ہے کہ ہم ان حملوں کے باوجود امن کے قیام کے لئے پر عزم ہیں، لیکن ہم اس قسم کے دہشتگردانہ حملوں کا پوری طاقت کے ساتھ جواب دیں گے۔ جمعہ کو غیر ملکی میڈیا کے مطابق دارالحکومت کابل میں باغ بالا کے قریب پولیس وردی میں ملبوس 1خودکش بمبار نے پولیس اکیڈمی کے مرکزی گیٹ پر خود کو دھماکے سے اڑا لیا، جس کے نتیجے میں 20اہلکار ہلاک اور متعدد زخمی ہوگئے۔ زخمیوں کو فوری طور پر طبی امداد کے لیے قریبی اسپتالوں میں منتقل کردیا گیا۔ اس سے قبل دارالحکومت کابل کے گنجان علاقے شاہ شہید میں ٹرک بم دھماکے میں15 افراد ہلاک، جبکہ خواتین اور بچوں سمیت 200سے زائد زخمی ہو گئے تھے۔ طالبان سربراہ ملا عمر کی ہلاکت کی تصدیق کے بعد یہ کابل میں پہلا بڑا حملہ تھا، تاہم ان کا اصل ہدف فلحال سامنے نہیں آسکا۔ حکام کے مطابق خودکش حملہ بارود سے بھرے ٹرک کے ذریعے کیا گیا تھا۔ صدارتی محل سے جاری ہونے والے بیان میں کہا گیا ہے کہ خودکش ٹرک بم دھماکے میں زخمی ہونے والوں میں 47خواتین اور 33بچے بھی شامل ہیں۔ صدر کے نائب ترجمان ظفر ہاشمی نے بتایا کہ 40زخمی ابھی تک اسپتالوں میں زیر علاج ہیں۔ بدھ کو اقوام متحدہ کی ایک رپورٹ میں بتایا گیا تھا کہ رواں سال کے پہلے نصف حصے میں افغان شہری ریکارڈ تعداد میں پرتشدد حملوں کا نشانہ بنے۔ رپورٹ کے مطابق 2015کے پہلے 6مہینوں میں 1592شہری ہلاک، جبکہ 3329زخمی ہوئے۔ دوسری جانب افغان صدر اشرف غنی نے خودکش حملوں کی شدید مذمت کرتے ہوئے کہا ہے کہ ہم ان حملوں کے باوجود امن کے قیام کے لئے پرعزم ہیں، لیکن ہم اس قسم کے دہشتگردانہ حملوں کا پوری طاقت کے ساتھ جواب دیں گے۔ افغان صدر نے دھماکوں میں شہریوں کے جانی نقصان پر اظہار افسوس کرتے ہوئے ان کے لواحقین کے ساتھ اظہار تعزیت بھی کی۔