بیجنگ.......چینی حکام نے امریکی بحری جہاز کے جنوبی چین میں متنازع جزیرے کے قریب سے گزرنے کو غیر قانونی کہہ کر اس کی مذمت کی ہے۔

حکام کا کہنا ہے کہ گائیڈڈ میزائلوں سے لیس امریکی بحری بیڑا یو ایس ایس لیسن چینی دعوی کے مطابق 12 ناٹیکل مائل زون میں داخل ہوا تھا ۔اس مصنوعی جزیرے پر جس پر چین اپنی حدود کا دعوی کرتا ہے، آزادانہ آمد و رفت چین کے لیے بڑا خطرہ ہے۔

چین کی وزارت خارجہ کا کہنا ہے کہ امریکی بحری جہاز کو تنبیہ کی گئی ہے اور یہ عمل چین کی سالمیت کے لیے خطرہ ہے۔وزارت خارجہ کے ترجمان لو کینگ نے مزید کہا کہ کسی بھی ملک کی جانب سے اس قسم کے اشتعال انگیز عمل کا چین منہ توڑ جواب دے گا۔
دوسری جانب امریکی محکمہ دفاع کے ترجمان بل اربن کا کہنا تھا کہ امریکہ معمول کے مطابق بین الاقوامی قوانین کے تحت جنوبی چین کے سمندر میں آپریشن کر رہا تھا۔امریکہ کے اس اقدام کا کئی مشرقی ایشیائی ممالک نے جن میں فلپائن اور جاپان شامل ہیں خیر مقدم کیا ہے۔

سمندر میں چٹانوں کے سلسلے کو جو آپس میں جڑا ہوا ہے چین نے صفائی کے منصوبے کے تحت 2013میں ایک جزیرے کی شکل دے دی تھی۔چین کا کہنا ہے کہ یہ کام قانونی ہے اور گذشتہ ماہ واشنگٹن میں چینی صدر شی جن پنگ اور امریکی صدر باراک اوباما کے درمیان ملاقات میں چینی صدر کا کہنا تھا کہ چین کا اس جزیرے پر فوج تعینات کرنے کا کوئی ارادہ نہیں ہے۔تاہم امریکہ کا یہ کہنا ہے کہ چین اس جزیرے پر عسکری تنصیبات نصب کر رہا ہے ۔