دبئی......چوتھے اور آخری ایک روزہ انٹرنیشنل میچ میں انگلینڈ نے پاکستان کے خلاف ٹاس جیت کر بیٹنگ کا فیصلہ کیا ہے، چار میچوں کی سیریزمیں مہمان ٹیم کو دو ایک کی برتری حاصل ہے۔

دبئی میں کھیلے جارہے میچ میں پاکستان نے ٹیم میں دو تبدیلیاں کی ہیں، افتخار احمد کی جگہ احمد شہزاد کی واپسی ہوئی ہے جبکہ یاسر شاہ گھٹنے کی انجری سے ریکوری کے بعد ظفرگوہر کی جگہ آج ٹیم کا حصہ ہیں۔

اب لڑکھڑانے والے پاکستانی بیٹسمینوں کیلئے یہ قدم جمانے اور خود کو بڑے اسکور کا اہل ثابت کرنے کا آخری موقع ہے۔

قومی ٹیم کے کپتان اظہر علی کا کہناہے کہ بیٹسمینوں کو ان کی ذمے داریاں بتادی گئی ہیں، ہمیں علم ہے کہ اب غلطی کی گنجائش نہیں ہے اور جیت کا واحد فارمولا جارحانہ کرکٹ اور ذمے داری ہے۔

متحدہ عرب امارات میں 6سال میں دس میں 8ون ڈے انٹر نیشنل سیریز ہارنے کے بعد پاکستانی کرکٹ ٹیم کو گیارہویں سیریز میں شکست سے بچنے کے لئے آج انگلینڈ کو فیصلہ کن ون ڈے میں ہر صورت میں شکست دینا ہوگی۔

دبئی اسٹیڈیم میں بھی پاکستان کا ریکارڈ زیادہ اچھا نہیں ہے یہاں پر قومی ٹیم نے14 میچوں میں حصہ لیا ہے جس میں سے 6جیتے اور 8میں اسے شکست ہوئی۔