لاس اینجلس .......مشہورِ زمانہ سائنس فکشن ایکشن ایڈونچر اسٹار وارز سلسلے کی ساتویں فلم ’دی فورس اویکنز‘کا لاس اینجلس میں ورلڈ پریمیئر ہوا، جہاں فلمی کرداروں کا روپ دھارے افراد ریڈ کارپٹ پر جلوہ گر ہوئے۔

اس موقع پر اپنے پسندیدہ کرداروں اور نامور اداکاروں کو دیکھنے کیلئے مداح بیحد پر جوش دِکھائی دئیے اور بڑی تعداد میں پریمیئر میں شرکت کیلئے لاس اینجلس کے تھیٹر کا رُخ کیا۔

پریمیئر میں جہاں ایک طرف اسٹار وارز کے نامور کردار اسٹورم ٹروپر، آر ڈی۔ڈی ٹو، یوڈااورڈارتھ ویڈرکا روپ دھارے مداح ریڈ کارپٹ پر دیکھنے والوں کومحظوظ کرتے رہے تودوسری جانب فلم میں جلوہ گر ہونیوالے اداکار بھی بیحد خوش دکھائی دئیے جبکہ شائقین کی بڑی تعداد میں تھیٹر پہنچنے کے باعث لاس اینجلس کی ہالی ووڈ بالیورڈ(Hollywood (Boulevardنامی سڑک آدھے میل تک ٹریفک کیلئے بند کر دی گئی ہے ۔

جے جے ابرامز کی ہدایت کاری میں بننے والی اس فلم کی کہانی اسٹار وارز کے روایتی کرداروں کے گرد گھومتی ہے جو جدید روبوٹس اور اْڑن طشتریوں پرسوار ہوکر نئے خلائی مشن پر روانہ ہوتے ہیں۔

فلم میں اپنی اداکاری کے جوہر دکھانے والے فنکاروں میں جان بویگا،ڈیزی ریڈلے،ایڈم ڈرائیور،آسکر ایساق،اینڈی سرکس،ہیریسن فورڈ اور مارک ہیمل سمیت دیگر شامل ہیں ۔

فلم والٹ ڈزنی پروڈکشنز کے بینر تلے 18دسمبر کو سینما گھروں میں نمائش کیلئے پیش کردی جائیگی۔