06 مارچ ، 2016 
بھارت :محبت کی شادی کر نے والی خاتون کو زندہ جلا دیا گیا
06 مارچ ، 2016
نئی دہلی ......... بھارتی ریاست راجستھان کے قبائلی ضلع ڈونگرپور میں محبت کی شادی کر کے آٹھ سال بعد گاؤں واپس آنے والی خاتون کو غیرت کے نام پر زندہ جلادیا گیا۔
پولیس کے مطابق خاتون کی موت کے سلسلے میں اس کے سگے بھائی سمیت سات افراد کو گرفتار کیا گیا ہے۔پولیس نے بی بی سی کو بتایا کہ آس پور تھانے کے علاقے میں راجپوت اکثریت والے گاؤں میں مرنے والی لڑکی کی راتوں رات آخری رسومات بھی ادا کر دی گئی۔اطلاع ملنے پر جب پولیس وہاں پہنچی تو گاؤں میں جس چوراہے پر خاتون کو مبینہ طور پر نذر آتش کیا گیا تھا وہاں صرف مٹی کے تیل کے نشانات اور واردات پر پڑی ریت ملی۔
تین نامزد ملزمان سمیت 35 افراد کے خلاف مقدمہ درج کیا گیا، پولیس کا الزام ہے کہ 30 سالہ رامیشوری کا راجپوت خاندان اپنی لڑکی کے ایک نوکر کے خاندان میں شادی کرلینے سے بے حد خفا تھا۔وہ شادی کے بعد شوہر کے ساتھ ممبئی میں رہ رہی تھی اور آٹھ سال بعد پہلی بار جمعرات کو اپنی تین سالہ کی بچی کے ساتھ واپس آئی تھی۔
