لندن......برطانیہ نے کہاہے کہ وہ دولت اسلامیہ عراق و شام (داعش) کے خلاف لڑائی میں مصروف عراقی مسلح افواج کی ٹریننگ کے لئے مزید فوجیوں کو عراق بھیجے گا۔

میڈیارپورٹس کے مطابق برطانیہ کے وزیر دفاع مائیکل فالن کا کہنا تھا کہ مزید 30 فوجیوں کو عراق بھیجا جائیگا اور وہ لاجسٹک، پلوں کی تیاری اور طبی امداد کے حوالے سے عراقی فوجیوں کو تربیت دیں گے۔ اس اقدام کے بعد عراق میں ٹریننگ کے مشن پر موجود برطانوی اہلکاروں کی تعداد 300 ہوجائے گی۔یہ اضافی فوجی بغداد کے نواحی علاقوں بسمایہ اور تاجی میں قائم ٹریننگ سینٹرز میں تعینات کیے جائیں گے۔

فالن کا کہنا تھا کہ داعش کے خلاف لڑائی میں ٹھوس پیش رفت ہوئی ہے۔ ان کا کہنا تھا اب وقت آگیا ہے کہ ہم عراقی فورسز کی ٹریننگ میں تیزی لے آئیں گے کیوںکہ وہ فلوجہ اور موصل جیسے اہم شہروں کو واگزار کروانے کی تیاری کررہے ہیں۔

فالن کا کہنا تھا کہ داعش کے خلاف برطانوی فضائیہ کی بمباری کے علاوہ ہمارے ٹرینرز کی موجودگی سے برطانیہ داعش کے خلاف جنگ میں اہم کردار ادا کررہا ہے۔ برطانیہ کے طیارے امریکا کے عالمی اتحاد میں شامل ہو کر عراق اور شام میں داعش کے خلاف بمباری کی کارروائیوں میں مصروف ہیں۔