کراچی میں انسداد دہشت گردی کی عدالت نے دہشت گردوں کو پناہ دینے سے متعلق کیس میں ایم کیو ایم رہنماعامر خان کی دبئی جانے سے متعلق درخواست پر فیصلہ 15 جون تک محفوظ کرلیا جبکہ ملزم منہاج قاضی کو جیل میں بی کلاس فراہم کرنے سے متعلق درخواست پر سرکاری وکیل کو نوٹس جاری کردیے۔

نائن زیرو پر دہشت گردوں کو پناہ دینے سے متعلق کیس کی سماعت انسداد دہشت گردی کی عدالت میں ہوئی۔ کیس میں نامزد ملزم عامر خان اور مفرور ملزم منہاج قاضی عدالت میں پیش ہوئے۔

اس موقع پرعامرخان کے وکیل نے عدالت سے استدعا کی کہ ان کے موکل کو بیرون ملک جانے کی اجازت دے جائے کیونکہ اگر عامرخان چھ ماہ میں باہر نہیں گئے تو انکے رہائشی ویزے کی مدت ختم ہوجائے گی۔

ملزم منہاج قاضی کے وکیل نے کہا کہ اس کا موکل پڑھا لکھا اور گریجویٹ ہے لہذا اسے جیل میں بی کلاس فراہم کی جائے۔ عدالت نے کیس میں مفرور ملزمان کے ایک بار پھر ناقابل ضمانت وارنٹ گرفتاری جاری کرتے ہوئے مزید سماعت 20 جولائی تک ملتوی کردی۔

مفرورملزمان میں نعیم ملا،شہزادملا،رئیس ماما،عمران اعجازنیازی شامل ہیں۔