اسلام آباد… وزیراعظم یوسف رضا گیلانی کے حق میں اسپیکر قومی اسمبلی کی رولنگ کے خلا ف سپریم کورٹ میں مقدمہ کے درخواست گزار وکلاء کاکہناہے کہ آرٹیکل 63 ون جی کا اطلاق ازخود ہوجاتا ہے، اپیل نہیں آئی، سزا حتمی ہوگئی ہے۔ ججوں نے عملدرآمد کیلئے آئین کے موثر نہ ہونے کے تاثر کی نفی کرتے ہوئے ریمارکس میں کہاہے کہ آئین موثر ہے اور یہ کسی کا گلا بھی پکڑ سکتا ہے۔چیف جسٹس افتخارمحمدچودھری کی سربراہی میں تین رکنی بنچ اسپیکر رولنگ کے مقدمہ کی سماعت کی۔ عدالتی نوٹسز کے باوجود وفاق، یوسف رضاگیلانی اور اسپیکر اسمبلی کی طرف سے جواب پیش نہیں کیا گیا۔ اٹارنی جنرل کاکہناتھاکہ خلاء میں ردعمل ظاہر نہیں کرسکتے،عدالت پہلے 6 جون والے نوٹس حکم کو تبدیل کرے، انہوں نے عدالتی بنچ پر عدم اعتماد کا اظہار بھی کیا، عدالت نے یہ دونوں ایشو مستر د کردئے۔ ایک درخواست گزار وکیل اے کے ڈوگر نے مقدمہ کا پس منظر بیان کرنا چاہا تو عدالت نے انہیں کہاکہ لمبی تحریر پڑھنے کی بجائے دلائل پر آئیں۔اے کے ڈوگر نے دلائل میں کہاکہ اٹھارہویں آئینی ترمیم کے بعد آرٹیکل 63 ون جی کے نفاذ میں اسپیکر اسمبلی یا الیکشن کمیشن کا کردار ختم ہوچکا ہے۔ عمران خان کے وکیل حامدخان نے کہاکہ اپیل نہ کرنے پرسزا کا فیصلہ حتمی ہوچکا ہے اور وزیراعظم نااہل ہوچکے ہیں۔ وقفہ کے بعد سماعت میں اٹارنی جنرل اور ایک اور درخواست گزار ظفرعلی شاہ نے ابتدائل دلائل میں جب عمل درآمد سے متعلق آئین کے معذور ہونے کا کہا تو چیف جسٹس نے اس کی نفی کی اور کہاکہ آئین زندہ دستاویز ہے۔ جسٹس خلجی عارف نے کہاکہ آئین موثر ہے ، یہ کسی کا گلا بھی پکڑ سکتا ہے ، اعتزاز احسن نے کہاکہ وہ وزیراعظم کے وکیل کے طور پر پیش ہورہے ہیں ، انہیں بدھ تک کا وقت دیا جائے،چیف جسٹس نے کہاکہ آپ کل تیاری کرکے ابتدائی دلائل دینے آئیے گا، بعد میں مقدمہ کی سماعت کل تک ملتوی کردی گئی۔