کراچی … کراچی کے مختلف علاقوں میں فائرنگ اور پرتشدد واقعات میں 2 خواتین اور بچے سمیت 12 افراد جاں بحق ہوگئے، جبکہ گلستان جوہر کے علاقے میں عوامی نیشنل پارٹی سے وابستہ لیاقت بنگش کی پر اسرار ہلاکت کے بعد صورتحال کشیدہ ہے۔ پولیس کے مطابق گلستان جوہر کے علاقے میں رابعہ سٹی سے ایک شخص کی لاش ملی، پولیس کاکہنا ہے کہ پر اسرار طور پر ہلاک ہونے والے شخص کی شناخت لیاقت بنگش کے نام سے ہوئی ہے، جو عوامی نیشنل پارٹی سے وابستہ بھی تھا اور ماضی میں پولیس کی جانب سے گرفتار بھی کیا گیا تھا جبکہ اس کے خلاف مختلف نوعیت کی ایف آئی آر بھی درج ہیں۔ گلستان جوہر کے علاقے میں نامعلوم ملزمان نے فائرنگ کرکے 2 پولیس اہلکاروں کو زخمی کردیا، جن کی شناخت سپاہی نعیم بٹ اور امجد کے نام سے ہوئی ہے، گلستان جوہر کے علاقے میں ہی پرفیوم چوک کے قریب فائرنگ سے 3 افراد زخمی ہوگئے، جس کے بعد پولیس نے فائرنگ کرنے والے 2 مبینہ ملزمان کو حراست میں بھی لے لیا ہے۔ جبکہ گلستان جوہر، لسبیلہ، یونیورسٹی روڈ پر عسکری پارک اور پٹیل پاڑہ کے علاقوں میں نامعلوم افراد کی فائرنگ سے علاقے میں خوف و ہراس پایا جاتا ہے، جس کے بعد ان علاقوں میں پولیس اور رینجرز کی اضافی نفری بھی تعینات کردی گئی ہے۔ ادھر قائد آباد کے علاقے میں شادی کی تقریب میں ہونے والی فائرنگ سے 6 سالہ حمزہ نامی بچہ ہلاک اور 8 سالہ عمران زخمی ہوگیا۔ سپرہائی وے پر گلشن معمار کے قریب واقع فارم ہاوٴس سے 2 افراد کی لاشیں ملیں، لاشیں ایک مرد اور ایک خاتون کی ہیں، پولیس واقعے سے متعلق مزید تحقیقات کررہی ہے۔ شیر شاہ کے علاقے میں گلی نمبر 11 کے مکان سے ایک شخص کی لاش ملی۔ کھوکھراپار کی مدینہ کالونی سے ایک خاتون کی 4 سے 5 روز پرانی تشدد زدہ لاش ملی ہے۔ رات گئے سپرہائی وے سے ملحقہ گڈاپ ٹاوٴن کے علاقے ناگوری اسٹاپ کے قریب نامعلوم افراد نے فائرنگ کرکے 3 افراد کو قتل کردیا۔ بلدیہ ٹاوٴن کے علاقے چاندنی چوک میں نامعلوم افرادنے فائرنگ کرکے ایک شخص کوہلاک کردیا جبکہ بغدادی تھانے کی حدورسے 2 افراد کی لاشیں ملی ہیں، مقتولین کو تشدد کے بعد فائرنگ کرکے قتل کیا گیا۔ پولیس کے مطابق مقتولین کی شناخت آصف اور ایوب کے نام سے ہوئی ہے۔