20 نومبر ، 2016 
محمداحمد پر مبینہ تشدد، تحقیقاتی ٹیم کی والد سے ملاقات
20 نومبر ، 2016
کیڈٹ کالج لاڑکانہ کے طالب علم محمد احمد پر مبینہ تشدد کے سلسلے میں وزیراعلیٰ کی تحقیقاتی ٹیم نے بچے کے والد سے کراچی میں ملاقات کی ہے۔
ذرائع کے مطابق کمیٹی نے طالب علم کے والد محمد راشد سے واقعے سے متعلق پوچھ گچھ کی اور محمد احمد کی میڈیکل رپورٹس کا معائنہ بھی کیا۔
اساتذہ کے مبینہ تشدد سے اپنے ہوش و حواس کھو بیٹھنے والے لاڑکانہ کیڈٹ کالج کے چودہ سالہ طالب علم محمد احمد کے والد محمد راشد نے بچے کے پہلے سے بیمار ہونے کی افواہوں کی تردید کی ہے،بچے کے والد کا کہنا ہے کہ محمد احمد کو کوئی بیماری نہیں تھی، کیڈٹ کالج میں داخلے سے قبل بچے کا مکمل طبی معائنہ کیا گیا تھا۔
محمد راشد نے کہا کہ علاج ملک کے اندر ہو یا امریکا میں، وزیراعلیٰ سندھ نے ہرممکن تعاون کی یقین دہانی کرادی ہے۔
محمد احمدکے والد نے کہا کہ جیو نیوز نے خبر چلا کر میری مشکل آسان کردی اور میرا گمنام دکھ عام کرکے حکمرانوں تک پہنچادیا۔
