کراچی میں سٹی کورٹ کے قریب واقع میڈیسن کے گودام میں آگ لگ گئی،آگ گودام کے گراؤنڈ فلور میں لگی ہوئی ہے۔آگ کا دھواں شہر بھر میں دور دور تک دکھائی دے رہا ہے۔

فائر بریگیڈ حکام کےمطابق آگ شدید ہے، فائربریگیڈ کی 6 گاڑیاں آگ بجھانے کی کوششوں میں مصروف ہیں، مکان کو دواؤں کے گودام کے طور پر استعمال کیا جارہا تھا۔

جس عمارت میں آگ لگی ہے اس سے متصل ایک عمارت میں نجی اسکول ہے اس عمارت تک آگ پہنچ چکی ہے جبکہ اس کے برابر عمارت میں لکڑیوں کا گودام بھی ہے، فائر بریگیڈ کی کوشش ہے کہ اس عمارت کو بھی بچا کر بھاری نقصان سے محفوظ رکھا جائے۔

فائر بریگیڈ کی گاڑیوں میں پانی ختم ہوگیا ہے جبکہ آگ پر قابو نہیں پایا جاسکا ہے جس کی وجہ سے لوگوں میں غم و غصہ پایا جاتا ہے۔

قریبی عمارتوں میں واقع گھروں اور عمارتوں سے لوگ محفوظ مقامات کی جانب منتقل ہو رہے ہیں اور اپنا سامان بھی منتقل کرنے کی کوشش کر رہے ہیں۔

آگ لگنے کے بعد ایم اے جناح روڈ پر دور تک اور اطراف کی سڑکوں پر ٹریفک جام ہوگیا اور لوگوں کو دفاتر سے گھروں کو جانے میں شدید دشواری کا سامنا ہے۔