محمد عامر کی جگہ عثمان شنواری ون ڈے اسکواڈ میں شامل

سری لنکا کے خلاف ایک روزہ میچز کی سیریز کے لئے فاسٹ بولر محمد عامر کی جگہ عثمان شنواری کو اسکواڈ میں شامل کرلیا گیا ہے۔

فاسٹ بولر محمد عامر دبئی ٹیسٹ کے دوران پنڈلی کی تکلیف کے باعث میچ سے باہر ہوگئے تھے اور ایم آر آئی رپورٹ سامنے آنے کے بعد ڈاکٹروں نے انہیں آرام کا مشورہ دیا تھا۔

پاکستان کرکٹ بورڈ کا کہنا ہے کہ محمد عامر کو ڈاکٹروں نے 2 سے 3 ہفتے آرام کا مشورہ دیا ہے جس کے بعد عثمان شنواری کو ون ڈے اسکواڈ میں شامل کرلیا گیا ہے۔ 

خیال رہے کہ عثمان شنواری قائداعظم ٹرافی میں حبیب بینک کی جانب سے کھیل رہے ہیں۔ 

پاکستان اور سری لنکا کے درمیان پہلا ون ڈے میچ 13 اکتوبر کو کھیلا جائے گا اور فاسٹ بولر عثمان شنواری پہلی دستیاب فلائٹ سے دبئی روانہ ہوجائیں گے۔